سەرۆک مەسعود بارزانی لەگەڵ سەرۆکی دەستەی حەشدی شەعبی کۆبووەوە و دوایین پێشهاتە سیاسی و ئه‌منییه‌كانی عێراق و ناوچەکەیان تاوتوێ کرد.
ئەمڕۆ بارەگای بارزانی لە ڕاگەیەندراوێکدا سازدانی کۆبوونەوەی نێوان سەرۆک بارزانی و فالح فەیازی لە پیرمام بڵاو کردەوە و به‌پێی ڕاگه‌یه‌نراوه‌كه، بیروڕا لە بارەی ڕەوشی ڕامیاری و پێشهاتە نوێیەکانی عێراق و ناوچەکە ئاڵوگۆڕ کرا.
هاوکات هەردوولا سەرنجیان خستە سەر ڕێڕەوی سیاسی عێراق و گرنگی پتەوکردنی هەماهەنگی نێوان سەرجەم لایەنەکان لە پێناو چەسپاندنی ئارامی و سەقامگیریدا.
چاوپێکەوتنی نێوان سەرکردەکانی هەرێمی کوردستان و کاربەدەستانی باڵای بەغدا لە چوارچێوەی هەوڵە بەردەوامەکاندایە بۆ چارەسەرکردنی ناکۆکییە سیاسییه‌كان و بەهێزکردنی هەماهەنگی نێوان هه‌ولێر و به‌غدا.
