دۆناڵد تره‌مپ لە کاتی گوتارێکی بانگەشەی هەڵبژاردندا لە ویلایەتی فلۆریدا، بە لێدوانێکی نامۆ لەبارەی خوشکەکانییەوە کاردانەوە و دەنگدانەوەیەکی بەرفراوانی لە تۆڕە کۆمەڵایەتییەکان و دەزگاکانی ڕاگەیاندنی جیهاندا دروست کرد؛ ناوبراو لە کاتی هێرشکردنە سەر ئیلهان عومەر، ئەندامی دیموکرات لە ئەنجوومەنی نوێنەراندا، باسی پێوەندیی خۆی لەگەڵ خوشکەکانیدا کرد.
ئەمڕۆ دەزگاکانی ڕاگەیاندنی ئەمریکا بڵاویانکردەوە، لە شاری دایتۆنا بیچ، تره‌مپ ڕووبەڕووی لێشاوی ڕەخنەی چاودێران بووەتەوە بەهۆی شێوازی دەربڕین و دەنگە نامۆکانی لە کاتی گوتارەکەیدا؛ ئەم کۆبوونەوە جەماوەرییە تەنیا چەند ڕۆژێک پێش هەڵبژاردنی نیوەی خولی کۆنگرێس بەڕێوە چوو.
لە بەشێکی گوتارەکەیدا، تره‌مپ سوێندی خوارد کە هەرگیز هاوسەرگیریی لەگەڵ هیچ کام لە خوشکەکانیدا نەکردووە و داوای هاوسەرگیرییشی لێ نەکردوون، هه‌روه‌ها ئاماژەی بەوە کرد پێشتر خەڵک پرسیاری ئەوەیان لێ کردووە کە ئایا لەگەڵ خوشکەکەیدا هاوسەرگیریی کردووە یان نا.
تره‌مپ بەڕوونی باسی خوشکەکانی کرد و گوتی: "من دوو خوشکی زۆر جوانم هەبوو، بەڵام تەنیا ئێلیزابێسی خوشکم لە ژیاندا ماوە. هەردووکیان زۆر جوان بوون، بەڵام ئەوان هەرگیز بە شێوازێکی تایبەت سەرنجی خەڵکیان بۆ لای خۆیان ڕانەکێشاوە و ئەو بابەتە کاری ئەوان نەبووە."
مەبەستی سەرەکی تره‌مپ لەم گوتەیەدا، هێرشکردنە سەر ئیلهان عومەر بوو کە ساڵانێکە لەلایەن بازنە کۆنەپارێزەکانەوە تۆمەتبار دەکرێت بەوەی گوایە لەگەڵ براکەیدا هاوسەرگیریی کردووە؛ هه‌رچه‌نده ئیلهان عومەر بەردەوام ئەم دەنگۆیانەی بە ناڕاست و بێبنەما ناو بردووە و ڕەتی کردوونەتەوە.
لە کاتی لێدوانەکەیدا، لایەنگرانی کۆمارییەکان لەناو هۆڵەکەدا پێکەنین، بەڵام لە تۆڕە کۆمەڵایەتییەکاندا تۆمارە بینراوەکە ملیۆنان بینەری تۆمار کرد و کاردانەوەی توندی بەدوای خۆیدا هێنا، زۆرێک لە ڕەخنەگران ئەم جۆرە گێڕانەوە و دەربڕینانەیان بە نەشیاو و ناپێویست ناو برد.
ڕەخنەگرانی سیاسی پێیان وایە کە ئەم جۆرە لێدوانە سەرنجڕاکێش و سەیرانە، سەرلەنوێ پرسیاری لەسەر تەندروستیی جەستەیی و شێوازی تره‌مپ لە تەمەنی 80 ساڵیدا دروست کردووەتەوە. ئەمەش دەرفەتی نوێی داوەتە دەست دیموکراتەکان تا هێرش بکەنە سەر شێوازی بەڕێوەبردنی هەڵمەتی هەڵبژاردنەکەی.
خێزانی تره‌مپ خاوەنی دوو کچ بوون؛ ماریان كه دادوەری پێشووی دادگەی پێداچوونەوەی فیدراڵی بوو لە ساڵی 2023 کۆچی دوایی کرد، هه‌روه‌ها خوشکەکەی دیکەی بە ناوی ئێلیزابێس بەرپرسێکی خانەنشینکراوی بانکییە و بە دەگمەن لە بۆنە گشتییەکاندا دەردەکەوێت.
ڕاوێژکارانی پارتی کۆماری نیگەرانی خۆیان دەربڕیوە لەوەی ئەم جۆرە لێدوانە لەناکاو و هەڵە زمانەوانییانە، دەنگدەرانی بێلایەن لە ویلایەتە یەکلاکەرەوەکاندا سارد بکاتەوە، ترسیان هەیە ئەم دەربڕینانە کاریگەریی نەرێنی لەسەر بەدەستهێنانی کورسییەکانی ئەنجوومەنی نوێنەران و ئەنجوومەنی پیراندا دروست بکات.
پێشتریش لە کانوونی یەکەمی ساڵی 2025 لە ویلایەتی پەنسلڤانیادا، تره‌مپ هەمان بەراوردی بۆ هێرشکردنە سەر ڕکابەرە سیاسییەکانی بەکار هێنابوو؛ ئەم ڕووداوە نوێیە نیشانی دەدات کە کێبڕکێی هەڵبژاردنەکان گەیشتووەتە هەستیارترین قۆناغی سیاسی.
