درامای کۆمیدی و ترسناکی 'وایدۆوز بەی' لە 78ەمین خولی دابەشکردنی خەڵاتەکانی ئێمیدا مێژوویەکی نوێی تۆمار کرد و بە بەدەستهێنانی 14 خەڵات، ژمارەی پێوانەییی سەرجەم زنجیرە کۆمیدییەکانی شکاند.
ئەمڕۆ ئاژانسی هەواڵی فرانس پرێس ڕایگەیاند، لە ئاهەنگی دابەشکردنی خەڵاتەکانی ئێمی لە شاری لۆس ئەنجلسدا، زنجیرەدرامای کۆمیدیی 'وایدۆوز بەی' خەڵاتی باشترین زنجیرەی کۆمیدی و 13 خەڵاتی دیکەی پێ بەخشرا، بەمەش پێش ژمارەی پێوانەییی زنجیرەی 'زە ستۆدیۆ' کەوت کە بە 13 خەڵات لە ساڵی ڕابردوودا تۆماری کردبوو.
چیرۆکی ئەم درامایە باس لە سەرۆکی شارەوانیی ناوچەیەکی نیو ئینگلتەرا دەکات کە هەوڵ بۆ بووژاندنەوەی گەشتیاری لە دوورگەیەکدا دەدات کە دەنگۆی هەبوونی ڕۆحی تێدایە؛ لەم بەرهەمەدا کەیتی دیپۆڵد خەڵاتی باشترین سیناریۆ و هیرۆ مورای خەڵاتی باشترین دەرهێنانی بەدەست هێنا.
لە بەشی نواندندا، ماسیۆ ڕیسی ئەکتەری بەریتانی خەڵاتی باشترین ئەکتەری سەرەکی بۆ ڕۆڵی سەرۆکی شارەوانی بردەوە، هاوکات بە بردنەوەی خەڵاتێکی دیکە بۆ کورتەزنجیرەی 'زە بیست ئین می' بووە یەکەم ئەکتەر لە مێژووی 78 ساڵەی ئێمیدا لە هەمان شەودا دوو خەڵاتی سەرەکیی نواندن لە دوو بەرهەمی جیاوازدا وەربگرێت.
هەروەها کەیت ئۆفلین و ستیڤن ڕووت، وەک دوو ئەکتەری هەمان دراما، خەڵاتی باشترین ئەکتەرانی یاریدەدەریان بەدەست هێنا. ڕیس لە کاتی وەرگرتنی خەڵاتەکەدا سەرکەوتنەکەی بۆ خەیاڵی تایبەت و بلیمەتیی دەگمەنی کەیتی دیپۆڵدی نووسەر گەڕاندەوە.
خەڵاتەکانی ئێمی بە بەرزترین ڕێزلێنانی تەلەڤزیۆنی دادەنرێن و هاوتای خەڵاتی ئۆسکارن لە سینەمادا. لەم خولەی ڕێوڕەسمەکەدا و هاوشانی زنجیرە کۆمیدییەکان، درامای پزیشکیی 'زە پیت' بۆ دووەم ساڵ لەسەریەک خەڵاتی باشترین درامای تەلەڤزیۆنیی بەدەست هێنا.
