پایتەختی هیندستان دەبێتە شوێنی کۆبوونەوەی لووتکەیی زیاتر لە 10 سەرۆکی وڵاتی زلهێزی جیهان کە پرسەکانی ململانێ، بازرگانی، وزە و ئاڵۆزی و گرژییەکانی ناوچەکەی تێدا تاوتوێ دەکرێت.
ئەمڕۆ ئاژانسی فرانس پرێس (AFP) ڕایگەیاند، شی جینپینگ سەرۆکی چین گەیشتە نیودەلهی بۆ بەشداریکردن لە لووتکەی بریکس شانبەشانی سەرکردەکانی هیندستان، ڕووسیا و ئێران بۆ ئەوەی پرسەکانی ململانێ، بازرگانی و وزە تاوتوێ بکەن.
پێش دەستپێکردنی کۆبوونەوەی لووتکەکە، نارێندرا مۆدی سەرۆکوەزیرانی هیندستان لەگەڵ هەریەک لە مەسعود پزیشکیان سەرۆککۆماری ئێران و ڤلادیمیر پوتین سەرۆکی ڕووسیا کۆبووەوە، لە کۆبوونەوەکاندا سەرۆکوەزیرانی هیندستان جەختی لە گرنگیی بەکارهێنانی دیپلۆماسی بۆ چارەسەری ئاڵۆزییەکانی ناوچەکە کردەوە.
کۆبوونەوەی لووتکەی بریکس لە ئەمڕۆ تا 13ی ئەم مانگە بەردەوام دەبێت و ئەم ئەندامانە بەشداری تێدا دەکەن:
1. نارێندرا مۆدی – سەرۆکوەزیرانی هیندستان
2. شی جینپینگ – سەرۆککۆماری چین
3. ڤلادیمیر پوتین – سەرۆککۆماری ڕووسیا
4. مەسعود پزیشکیان – سەرۆککۆماری ئێران
5. سیریل ڕامافۆسا – سەرۆککۆماری باشووری ئەفریقا
6. عەبدولفەتاح سیسی – سەرۆککۆماری میسر
7. پرابۆوۆ سوبیانتۆ – سەرۆککۆماری ئیندۆنیزیا
8. ئابی ئەحمەد – سەرۆکوەزیرانی ئەسیۆپیا
9. شێخ خالید بن محەممەد بن زاید – جێگری میراتگری ئەبوزەبی، نوێنەری ئیمارات
10. ماورۆ ڤیێرا – وەزیری دەرەوەی بەرازیل، نوێنەری بەرازیل
11. فەیسەڵ بن فەرحان – وەزیری دەرەوەی سعودیە، نوێنەری سعودیە
گرووپی بریکس لە ساڵی 2009 دامەزرا بۆ کۆکردنەوەی ئابوورییە تازەپێگەیشتووەکان لە دەرەوەی چوارچێوەی ئەو بلۆکانەی حکومەتەکانی ئەمریکا و وڵاتانی ڕۆژئاوا باڵادەستن تێیاندا، دواتر ئەم گرووپە فراوانتر بوو بۆ لەخۆگرتنی چەندین وڵاتی دیکە لە ناوچە جیاوازەکانی جیهان بۆ ڕەخساندنی هاوسەنگی زیاتر لە سیستەمی نێودەوڵەتیدا.
