وەزیری ناوخۆی حکومەتی هەرێمی کوردستان لە کۆنگرەیەکی ڕۆژنامەوانیدا، هەڵوێستی فەرمیی هەرێمی کوردستانی لەسەر کۆمەڵێک پرسی هەستیاری ئەمنی، سیاسی و دارایی لەگەڵ بەغدا ڕوون کردەوە.
ئەمڕۆ ڕێبەر ئەحمەد، وەزیری ناوخۆی حکوومەتی هەرێمی کوردستان لە کۆنگرەیەکی ڕۆژنامەوانیدا ڕایگەیاند، جێبەجێکردنی ڕێککەوتننامەی شنگال باشترین بژاردەیە بۆ گێڕانەوەی ئارامی و دەرکردنی هێزە چەکدارە نایاسایییەکان لەناو شارەکەدا؛ ناوبراو دژایەتیی توندی خۆی بۆ دانانی قایمقامی سەربازی دەربڕی و بە خراپترین بژاردە ناوزەندی کرد، هاوکات داوای کرد لە ڕێگەی لێکتێگەیشتن لەگەڵ ئەنجوومەنی پارێزگای نەینەوا و لایەنە سیاسییەکاندا ئیدارەیەکی خزمەتگوزار پێک بهێنرێت.
لە بەشێکی دیکەی کۆنگرەکەدا، وەزیری ناوخۆ سەبارەت بە کشانەوەی هێزەکانی هاوپەیمانان هۆشداریی دا لە دروستبوونی بۆشاییی ئەمنی، داواشی کرد هەماهەنگیی زیاتر لەنێوان هەولێر، بەغدا و هاوبەشە نێودەوڵەتییەکاندا هەبێت بۆ پاراستنی ئاسایش و سەقامگیریی ناوچەکە.
سەبارەت بە دۆسیەی ئابووری و دارایی، وەزیری ناوخۆ جەختی لە ئامادەییی تەواوی هەرێمی کوردستان بۆ دەستپێکردنەوەی هەناردەی نەوت لە ڕێگەی بۆرییەوە کردەوە و ڕوونی کردەوە کە ئێستا چاوەڕوانی ڕێککەوتنی نێوان بەغدا و کۆمپانیا بیانییەکانن؛ لەگەڵ دابینکردنی سیستەمی بەرگریی دژەدرۆن بۆ مسۆگەرکردنی گەرەنتیی ئەمنی بۆ کێڵگە نەوتییەکان لە ناوچەکەدا.
لە پرسی پشکی بودجەشدا، ڕێبەر ئەحمەد ڕوونی کردەوە کە بەپێی ئاماری فەرمیی سەرژمێریی گشتی کە لە ساڵی 2025دا ئەنجام درا، ژمارەی دانیشتووانی هەرێمی کوردستان بەبێ ناوچە جێناکۆکەکان 14.1%ی کۆی دانیشتووانی عێراق پێک دەهێنن؛ بۆیە پێویستە حکوومەتی فیدراڵ بودجەیەکی گشتگیر لەسەر ئەم بنەمایە بنێرێت، نەک تەنیا تەرخانکردنی مووچە.
لە کۆتاییی کۆنگرە ڕۆژنامەوانییەکەدا، وەزیری ناوخۆ ئاماژەی بە پرسی کۆچبەران کرد و ئاشکرای کرد کە بە هەوڵی مەسرور بارزانی، سەرۆکوەزیرانی هەرێمی کوردستان، نزیکەی 390 هاووڵاتی کە لە زیندانە سەختەکانی لیبیادا بوون، ڕزگار کراون و بۆ هەرێمی کوردستان گەڕێندراونەتەوە.
