توێژینەوەیەکی نوێ دەری دەخات کە ئاستی پەیوەندییە کۆمەڵایەتییەکان و هاوڕێیەتی لە نێوان گەنجانی ئینگلتەرا بە شێوەیەکی بەرچاو دابەزیوە.
پەیمانگای لێکۆڵینەوەی سیاسەتە گشتییەکانی بەریتانیا (IPPR) ڕایگەیاند، لە هەر 20 گەنجێکی تەمەن 16 بۆ 21 ساڵ، یەکێکیان هیچ هاوڕێیەکی نزیکی نییە؛ ئەم ڕێژەیەش بەراورد بە دەیەی ڕابردوو 5 هێندە بەرز بووەتەوە. ڕاپۆرتەکە کە لەژێر ناوی "نەوەی هەرە تەنیا" بڵاو کراوەتەوە، ئاماژە بەوە دەدات کە ڕێژەی ئەو گەنجانەی لانی کەم 3 هاوڕێی نزیکیان هەیە، لە ساڵانی 2023 بۆ 2025 گەیشتووەتە 72 لە سەدا، لە کاتێکدا لە نێوان ساڵانی 2012 بۆ 2024 ئەم ڕێژەیە 85 لە سەدا بووە.
بەپێی زانیارییەکانی ئەم توێژینەوەیە، ڕەزامەندیی مێردمنداڵانی تەمەن 14 بۆ 15 ساڵ لەسەر هاوڕێیەتییەکانیان بۆ 76 لە سەدا پاشەکشەی کردووە. توێژەران هۆکاری ئەم قەیرانە تەنیا بۆ بەکارهێنانی مۆبایل و تۆڕە کۆمەڵایەتییەکان ناگێڕنەوە، بەڵکو دەیبەستنەوە بە لێکەوتەکانی پەتای کۆرۆنا و کەمیی خزمەتگوزاری و شوێنە گشتییەکان بۆ کۆبوونەوەی گەنجان.
داتاکانی دەستەی پەیوەندییەکانی بەریتانیا (Ofcom) نیشانی دەدەن کە هەرزەکاران ڕۆژانە نزیکەی 6 کاتژمێر و نیو لەسەر هێڵی ئینتەرنێت بەسەر دەبەن. خووگرتن بە خوێندنەوەی هەواڵە نەرێنییەکان و بەکارهێنانی بەردەوامی پلاتفۆرمەکانی وەک یوتیوب و تیکتۆک، بووەتە هۆی کەمبوونەوەی دەرفەت بۆ دروستکردنی پەیوەندیی ڕاستەوخۆ.
ئەم دابڕانە کۆمەڵایەتییە کاریگەریی نەرێنیی لەسەر تەندروستیی دەروونی دروست کردووە؛ بە جۆرێک 47 لە سەدای کچان و 36 لە سەدای کوڕانی تەمەن 16 بۆ 24 ساڵ تووشی فشار و دڵتەنگیی دەروونی بوون. هەروەها ڕێژەی ئەو کەسانەی بە هۆی باری دەروونییەوە توانای کارکردنیان کەم بووەتەوە، لە 4.1 لە سەداوە بۆ 16.8 لە سەدا بەرز بووەتەوە.
پەیمانگای لێکۆڵینەوەی سیاسەتە گشتییەکانی بەریتانیا، دامەزراوەیەکی هزریی سەربەخۆیە و کار بۆ داڕشتنی سیاسەتی جێگرەوە دەکات تا چارەسەری کێشە ئابووری و کۆمەڵایەتییەکان بکات. حکومەت و لایەنە پەیوەندیدارەکانی بەریتانیا بۆ تێگەیشتن لە ئاڵەنگارییەکانی بەردەم کۆمەڵگە، زۆرجار پشت بە ڕاپۆرتەکانی ئەم دامەزراوەیە دەبەستن.
