لە چەند وڵاتێکی کیشوەری ئەوروپادا، دەزگاکانی ئاسایش دوای زنجیرەیەک هۆشداریی هەبوونی بۆمب کەوتنە باری ئامادەباشیی تەواوەوە؛ بەهۆی ئەم مەترسییانەوە، دەیان فڕۆکەی سەرنشین و کەشتییەکی گەشتیاری بە ناچاری ڕێڕەوی خۆیان گۆڕی و لەناکاو نیشتنەوە.
ئەمڕۆ دەزگا ڕاگەیاندنە نێودەوڵەتییەکان بڵاویانکردەوە، فڕۆکەیەکی هێڵی ئاسمانیی ئێر لینگۆس لە کاتی گەشتکردندا لە دەبلنەوە بەرەو ڕۆما، بەهۆی گومانی بوونی بۆمب ڕێڕەوەکەی بەرەو فەڕەنسا گۆڕدرا و لە بنکەیەکی لەشکر لە نزیک پاریس، لەگەڵ هەموو سەرنشینەکانیدا بێ زیان نیشتەوە.
هاوکات لە بولگاریا 3 فڕۆکە بە ناچاری لەناکاو نیشتوونەتەوە، دەسەڵاتدارانی ئیتاڵیا و بەلجیکاش هۆشداریی هاوشێوەیان لەبارەی چەند گەشتێکی ئاسمانی لە شارەکانی ڕۆما، میلانۆ و برۆکسل پێ گەیشتووە و دەستەکانی پووچەڵکردنەوەی تەقەمەنی خرانە باری ئامادەباشییەوە.
بەپێی زانیارییەکان، ئاستی مەترسییەکان کەرتی گەشتوگوزاری دەریاییشی گرتووەتەوە؛ دەسەڵاتدارانی یۆنان لە بەندەری دوورگەی سیرۆس ئامادەباشیی ئاسایشیان ڕاگەیاند پاش ئەوەی لە پێوەندییەکی تەلەفۆنیدا هەڕەشەی تەقاندنەوەی کەشتییەکی گەشتیاری کرا.
ئەو کەشتییە بە ناوی 'کراون ئایریس' بە ئاڵای پەنەماوە بەرەو بەندەری حەیفا بەڕێ کەوتبوو، هەروەها هەڵگری 940 گەشتیار و 597 کارگوزار بوو، بەڵام دوای پشکنینی وردی بنئاو و بەکارهێنانی سەگی ڕاهێنراو، هیچ تەقەمەنییەک لەناو کەشتییەکەدا نەدۆزرایەوە.
پێشتریش 7 هۆشداریی هاوشێوە لەبارەی بوونی تەقەمەنی لەناو گەشتە ئاسمانییەکانی سەر بە کۆمپانیاکانی ڕایان ئێر، لۆتی پۆڵەندی، ئێس ئەی ئێس و ویز ئێر درابوون، لە کاتێکدا فڕۆکەکان بەرەو پۆڵەندا، ئیسپانیا، ئیتاڵیا و بولگاریا دەڕۆیشتن، بەڵام دوای گرتنەبەری ڕێوشوێنی توندی پاراستن دەرکەوت سەرجەم هۆشدارییەکان ناڕاست بوون و هیچ مەترسییەک نەبووە.
لە کاتی سەرهەڵدانی گرژییە نێودەوڵەتییەکاندا، بەردەوام هێڵە ئاسمانی و دەریاییەکان تووشی شەپۆلی هەڕەشەی گوماناوی و هەواڵی ناڕاست دەبنەوە، ئەمەش دەسەڵاتدارانی فڕۆکەوانی ناچار دەکات بەرزترین ئاستی ڕێوشوێنی خۆپارێزی بگرنە بەر.
