لە باکووری ڕۆژئاوای پاکستان، داڕمانی سەقفی قوتابخانەیەکی تایبەت گیانلەدەستدانی نزیکەی 30 کەسی لێکەوتەوە و دەیانی دیکەش بریندار بوون.
ئەمڕۆ بەرپرسانی تەندروستی و فریاگوزاریی پاکستان ڕایانگەیاند، بەهۆی داڕمانی سەقفی بینای قوتابخانەیەکی سەرەتایی لە شاری پێشاوەر لە هەرێمی خەیبەر پەختونخوا، بە لایەنی کەمەوە 27 منداڵ لەگەڵ مامۆستایەکی ژن گیانیان لەدەست داوە، جیا لەوەی زیاتر لە 36 کەسی دیکە بریندار بوون.
لێدی ڕیدینگ، گوتەبێژی نەخۆشخانەی فێرکاریی لە پێشاوەر ڕوونی کردەوە، هەموو قوربانییەکان تەمەنیان لە خوار 13 ساڵەوەیە و ڕەوشی تەندروستیی بەشێک لە بریندارەکان ناجێگیرە، بەپێی زانیارییەکانی دەزگاکانی فریاکەوتن، ڕووداوەکە لە گەڕەکێکی قەرەباڵغی ناوەڕاستی شارەکەدا ڕووی داوە و خەڵکی ناوچەکە یەکەم کەس بوون هاوکاریی دەرهێنانی قوربانییەکانیان کردووە.
فەرماندەی پۆلیسی شاری پێشاوەریش ئاشکرای کرد، خاوەنی قوتابخانەکە دەستگیر کراوە، چونکە لێکۆڵینەوە سەرەتایییەکان دەریانخستووە بیناکە لە بنەڕەتدا لاواز بووە و مەرجەکانی سەلامەتیی تێدا پەیڕەو نەکراوە.
داڕمانی باڵەخانە لە پاکستان بەهۆی کەممتەرخەمی لە جێبەجێکردنی مەرجەکانی بیناسازی لەلایەن دامەزراوەکانی حکومەت و بەکارهێنانی کەرەستەی بێکوالێتی بەردەوام قوربانیی گەورەی لێ دەکەوێتەوە، بەجۆرێک لە مانگی تەممووزی ڕابردووشدا ڕووداوێکی هاوشێوە لە شاری لاهوور گیانی 4 قوتابیی سەند.
