هەوڵەکان بۆ یەکلاییکردنەوەی تەواوکاریی کابینەی نوێی حکومەت لە عێراق گەیشتنە قۆناغی کۆتایی و یەکێک لە فراکسیۆنە سەرەکییە کوردییەکان بەربژێرانی خۆی بۆ دوو پۆستی باڵا ئاشکرا کرد.
ئەمڕۆ د. دانەر عەبدولغەفار، گوتەبێژی فراکسیۆنی پارتی دیموکراتی کوردستان لە پەرلەمانی عێراق ڕایگەیاند، پەرلەمان کۆبوونەوەیەکی تایبەت بۆ دەنگدان لەسەر تەواوکردنی کابینەی حکومەتەکەی عەلی زەیدی و پڕکردنەوەی پۆستە وەزارییە بەتاڵەکان ئەنجام دەدات.
لە ڕاگەیەندراوە فەرمییەکەدا ناوی بەربژێرانی ئەو حزبە بۆ شایستە باڵاکان لە بەغدا ئاشکرا کران، بە جۆرێک دکتۆر فارس شێخ سدیق بریفکانی بۆ پۆستی جێگری سەرۆکوەزیرانی عێراق و ڕێباز محەممەد عەبدوڵڵا (ڕێباز حەملان) بۆ وەرگرتنی پۆستی وەزیری ئاوەدانکردنەوە و نیشتەجێکردن دەستنیشان کراون.
دانیشتنەکەی پەرلەمانی عێراق کاتژمێر 7:00ـی ئێوارەی ئەمڕۆ 15ـی تشرینی یەکەمی 2026 بە شێوەیەکی داخراو و بەبێ ئامادەبوونی دەزگاکانی ڕاگەیاندن بەڕێوە دەچێت، کارنامەی ئەم کۆبوونەوەیە بە شێوەیەکی سەرەکی تایبەت کراوە بە یەکلاییکردنەوەی بەربژێرانی جێگرانی سەرۆکوەزیران، دەنگدان لەسەر ئەو وەزارەتانەی تاوەکو ئێستا بەبێ وەزیر ماونەتەوە، هاوکات بڕیاردان لەسەر دەستپێشخەریی دامەزراندنی چەند وەزارەتێکی نوێ لەنێو پێکهاتەی کابینەکەدا.
عەلی فالح زەیدی، لە 14ـی ئایاری 2026 بە دەنگی پەرلەمانی عێراق بووە سەرۆکوەزیرانی وڵاتەکە، بەڵام لەبەر ناکۆکییە سیاسییەکان، لەو کاتەدا تەنیا 14 وەزیر لە کۆی 23 وەزیر پەسەند کران و 9 پۆستی وەزاری بەتاڵ مانەوە.
پاش نزیکەی پێنج مانگ گفتوگۆ و دانوستان لەنێوان لایەنە سیاسییەکان، پەرلەمان دانیشتنێکی بۆ ئێوارەی 15ـی تشرینی یەکەمی 2026 دیاری کردووە، بۆ دەنگدان لەسەر کاندیدەکانی وەزارەتە بەتاڵەکان و پۆستە نوێ پێشنیارکراوەکان، بە مەبەستی تەواوکردنی پێکهاتەی کابینەکە.
