هەوڵەکان بۆ تەواوکردنی پێکهاتەی کابینەی نوێی حکومەت لە عێراق پێ دەنێنە قۆناغێکی چارەنووسسازەوە و ڕێککەوتن لەسەر دروستکردنی 3 وەزارەتی نوێ کراوە.

 
ئەمڕۆ ئاژانسی هەواڵی عێراق (واع) بڵاوی کردەوە، ڕیاز تەمیمی، ئەندامی پەرلەمان لە فراکسیۆنی سادقوون ئاشکرای کردووە کە لە کابینەی نوێدا 3 وەزارەتی نوێ بە ناوەکانی (گەشتوگوزار، دەوڵەت بۆ کاروباری کەمینەکان، هەروەها ئابووریی دیجیتاڵی و حوکمڕانی) دادەمەزرێن.

 
بەپێی زانیارییەکان، پۆستی گەشتوگوزار بۆ عەلی دوخەیلی و کەمینەکانیش بۆ پێکهاتەی تورکمان و کاندیدەکەیان محەممەد سەمعان یەکلایی بووەتەوە، لە کاتێکدا کاندیدی وەزارەتی ئابووریی دیجیتاڵی لە کاتی دەنگداندا ئاشکرا دەکرێت و پشکی فراکسیۆنی خزمەتگوزارییەکانە.

 
بەپێی لێدوانی ئەو پەرلەمانتارە، زۆربەی پۆستە بنەڕەتییەکان کاندیدەکانیان یەکلایی کراونەتەوە بەم شێوەیە:

 یاسر مالیکی بۆ وەزارەتی ناوخۆ
نایف شەممەری بۆ وەزارەتی بەرگری
یاسین عیساوی بۆ وەزارەتی ڕۆشنبیری
حەیدەر بەهائی بۆ وەزارەتی خوێندنی باڵا
سەفا کینانی بۆ وەزارەتی لاوان و وەرزش
محەممەد مووسەوی بۆ وەزارەتی کار
ڕێباز حەملان بۆ وەزارەتی ئاوەدانکردنەوە
 
لەگەڵ ئەوەشدا، هەردوو وەزارەتی پلاندانان و کۆچ و کۆچبەران هێشتا یەکلایی نەبوونەتەوە، بەڵام پێشنیاز هەیە ئیڤان فایەق جابرۆ وەک کاندیدی پێکهاتەی مەسیحی بۆ وەزارەتی کۆچ پەسەند بکرێت.
 
دابەشکردنی پۆستە وزارییەکان لە عێراق، بەردەوام لەسەر بنەمای تەوافوق و پشکپشکێنەی نێوان لایەنە سەرەکییەکان بەڕێوە دەچێت، ئەمەش پرۆسەی پێکهێنانی کابینەی حکومەت لەگەڵ ئاستەنگی و دواکەوتندا ڕووبەڕوو دەکاتەوە.