کۆنگرە ڕۆژنامەوانییە هاوبەشەکەی فەرماندەییی هێزە چەکدارەکانی عێراق، نەخشەڕێگەیەکی نوێی بۆ پاراستنی سەقامگیری و کۆنترۆڵکردنی تەواوی دۆسیە ئەمنییەکان خستە ڕوو. لەم کۆنگرەیەدا نوێنەرانی سەرجەم دامەزراوە سەربازی و هەواڵگرییەکان، دوایین ئامار و دەستکەوتەکانیان لە بوارەکانی بەرەنگاربوونەوەی تیرۆر، تاوان و پاراستنی سەروەریی نیشتمانی ڕاگەیاند.
ئەمڕۆ لە کۆنگرەیەکی ڕۆژنامەوانیی هاوبەشدا لە نووسینگەی فەرماندەی گشتیی هێزە چەکدارەکان، فەریق سەعد مەعن، سەرۆکی شانەی ڕاگەیاندنی ئەمنی ڕایگەیاند، ڕێگە بە دروستبوونی ناکۆکی، ڕق و کینە و دەنگۆی تائیفی نادرێت و ڕێکاری یاسایی توند بەرامبەر سەرپێچیکاران دەگیرێتە بەر.
هاوکات سەباح نعمان، گوتەبێژی دەزگای دژەتیرۆر جەختی کردەوە کە ئەرکی هاوپەیمانیی نێودەوڵەتی لە 30ی ئەیلوولی داهاتوودا بە فەرمی کۆتایی دێت و دۆسیەی چەک بە تەواوی دەخرێتە ژێر چەتری دەوڵەت، هاوشان لەگەڵ دامەزراندنی سندووقی دارایی تایبەت بۆ کڕینی سیستمی پێشکەوتووی بەرگریی ئاسمانی.
سەبارەت بە وەزارەتی بەرگری، لیوا یەحیا ڕەسوڵ، گوتەبێژی وەزارەتەکە، دەنگۆی کشانەوەی سوپای لە ناوچەی دووزخورماتوو ڕەت کردەوە و بوونی هێزەکانی پشتڕاست کردەوە. ناوبراو ئاشکرای کرد کە سەرۆکایەتیی ئەرکانی سوپا، پلانێکی گشتگیری بۆ بەهێزکردنی تواناکانی هێزی ئاسمانی و پەرەپێدانی بەرگریی ئاسمانی بە هەماهەنگی لەگەڵ کۆمپانیا جیهانییە باوەڕپێکراوەکان داڕشتووە.
موهەننەد عوقابی، بەڕێوەبەری ڕاگەیاندنی دەستەی حەشدی شەعبی، جەختی لە پشتیوانیی تەواوی هێزەکانیان بۆ بڕیارەکانی فەرماندەی گشتی کردەوە و ڕایگەیاند، کارمەندانی ڕاگەیاندنی حەشد ئاهەنگی ڕۆژی سەروەری بۆ کشانەوەی هاوپەیمانان ساز دەکەن، لە کاتێکدا هێزەکانیان لە تەواوی ناوچەکان بۆ لێدانی حەشارگەکانی داعش بەردەوامن لە ئۆپەراسیۆنەکانیان.
هەر لە کۆنگرەکەدا، ئەرشەد حاکم، گوتەبێژی دەزگای ئاسایشی نیشتمانی، دەستکەوتە دارایی و ئەمنییەکانی نیوەی یەکەمی ساڵی 2026ی ئاشکرا کرد کە دیارترینیان گەڕاندنەوەی زیاتر لە 93 ملیار دینار بوو بۆ خەزێنەی دەوڵەت، لەگەڵ دەستبەسەرداگرتنی 14 ملیۆن دۆلار و 12 ملیار دینار و ڕادەستکردنیان بە بانکی ناوەندیی عێراق. گوتەبێژی دەزگای ئاسایشی نیشتمانی ئاشکرای کرد کە ئۆپەراسیۆنی گەورە دژی پاشماوەکانی حزبی بەعسی قەدەغەکراو ئەنجام دراوە و 40 تۆمەتباریان دەستگیر کردووە.
دەزگاکە توانیویەتی 754 هێرشی ئەلیکترۆنی و 2,740 ئەکاونتی هەڕەشەئامێز چارەسەر بکات، تێکدانی تۆڕی زەوییەکانی پارێزگای موسەنا بە 61 دەستگیرکراو و ڕێگری لە بەهەدەردانی 2 ملیار دینار ڕابگەیەنێت، لەگەڵ پووچەڵکردنەوەی هەوڵێکی دروستکردنی درۆن لە بەغدا کە تێیدا 3 تۆمەتبار دەستگیر کران و 25 پەیکەری درۆن و کەرەستەی دروستکردنی دەستی بەسەردا گیرا.
