حکومەتی نوێی بەریتانیا پلانێکی گشتگیری بۆ نەهێشتنی دیاردەی سەر شەقام کەوتنی سەرجەم بێلانەکان تاوەکو جەژنی کریسمس ڕاگەیاند.
ئەمڕۆ نووسینگەی سەرۆکوەزیرانی بەریتانیا بڵاوی کردەوە، ئەندی بێرنھام، سەرۆکوەزیرانی نوێی بەریتانیا پڕۆژەیەکی بە بودجەی 442 ملیۆن پاوەند (نزیکەی 666 ملیۆن دۆلار) بۆ پشتگیریکردنی ئەو هاووڵاتییانەی بێلانەن ڕاگەیاندووە و دەیەوێت تا سەری ساڵی نوێ ئەم کێشەیە چارەسەر بکات.
بێرنهام ئاماژەی بەوە کردووە، جێی قبووڵ نییە پێنجەم گەورەترین وڵاتی جیهان لە ڕووی ئابوورییەوە نەتوانێت هاووڵاتییانی خۆی لەسەر شەقامەکان ڕزگار بکات؛ ئانجیلا ڕەینەر، وەزیری نیشتەجێکردنی بەریتانیا جەختی لەوە کردەوە، ئەم بودجەیە یارمەتیی هەزاران کەس دەدات بۆ دەستپێکردنەوەی ژیانێکی نوێ لە نێو ماڵێکی ئارامدا.
ئەم پلانە نوێیەی سەرۆکوەزیرانی بەریتانیا ڕووبەڕووی ڕەخنەی توندی پارتی پارێزگارانی ئۆپۆزسیۆن بووەوە؛ جەیمس کلیڤەرلی، گوتەبێژی کاروباری نیشتەجێکردنی پارتەکە ڕایگەیاند، پڕۆژەکە بەبێ بوونی پلانێکی ڕوونی جێبەجێکردن پێشکەش کراوە و هیچ ڕوونکردنەوەیەک لەسەر سەرچاوەی دابینکردنی بودجەکەی نەدراوە. بێرنهام پێشتر لە کاتی کارکردنی وەک سەرۆکی شارەوانیی مانچستەر بەڵێنی هاوشێوەی دابوو، بەڵام سەرەڕای هەندێک سەرکەوتنی سەرەتایی، نەیتوانی بە تەواوی کۆتایی بەو دیاردەیە بهێنێت.
ئامارە فەرمییەکان دەریدەخەن لە ساڵی 2025دا ژمارەی بێلانەکان لەسەر شەقامەکانی ئینگلتەرا گەیشتووەتە ئاستێکی پێوانەیی، بە جۆرێک کە لە یەک شەودا 4 هەزار و 793 کەس لەسەر شەقامەکان خەوتوون؛ ڕێکخراوە خێرخوازییەکان هۆشداری دەدەن ئەم ڕێژەیە تاوەکو ساڵی 2030 ئەگەری هەیە بەرزبوونەوەی زیاتر بە خۆیەوە ببینێت.
