تەقینەوەی ڕوومانەیەک لە دهۆک کرێکارێکی بریندار کرد

 لە گەڕەکی گەڤەرکێی شاری دهۆک، کرێکارێک بەهۆی تەقینەوەی ڕوومانەیەکی کۆن بە سووکی بریندار بوو.

ئه‌مڕۆ بەڕێوەبەرایەتیی گشتیی کاروباری مین لە دهۆک ڕایگەیاند، تیمەکانیان ڕاستەوخۆ گەیشتوونەتە شوێنی ڕووداوەکە و لێکۆڵینەوەیان دە ست پێکردووە.

به‌پێی زانیارییه‌كان، محەممەد سەڵاحەدین، کرێکاری تەمەن 24 ساڵ، لە کاتی نۆژەنکردنەوەی بینایەکدا 3 ڕوومانەی کۆنی بینیوە و بەهۆی دەستکاریکردنی یەکێکیانەوە تووشی تەقینەوە بووە.

بریندارەکە گواستراوەتەوە بۆ نەخۆشخانەی فریاکەوتنی دهۆک و به‌ گوته‌ی پزیشکەکان دۆخی تەندروستیی جێگیرە بەڵام ساچمە لە جەستەیدا ماوەتەوە.

به‌پێی بڵاوكراوه‌كه‌ی بەڕێوەبەرایەتیی گشتیی کاروباری مین، تیمه‌کانی مین توانیویانه‌ 2 ڕوومانەکەی تر بە شێوەیەکی ئارام بگوازنەوە و شوێنەکە لە پاشماوەی تەقەمەنییەکان پاک بکەنەوە.

بەرپرسانی ئەمنی داوا لە هاووڵاتییان دەکەن لە کاتی بینینی هەر پاشماوەیەکی جەنگ دەستکاریی نەکەن و پەیوەندی بە هێڵی 182 وە بکەن.