پێنج نیشانەی سەرەتایی شەکرە کە زۆربەی خەڵک پشتگوێی دەخەن
چۆن خانمانی دووگیان خۆیان لە مەترسیی شەکرەی کاتی دەپارێزن؟
تۆێژینەوە پزیشکییەکان و ڕێکخراوە تەندروستییە نێودەوڵەتییەکان هۆشداری دەدەن لە زیادبوونی بەردەوامی ڕێژەی تووشبوون بە نەخۆشیی شەکرە، کە وەک یەکێک لە مەترسیدارترین نەخۆشییە درێژخایەنەکانی سەردەم دەستنیشان دەکرێت و کاریگەریی ڕاستەوخۆی لەسەر تێکدانی سیستەمی گۆڕینی خۆراک بۆ وزە هەیە.
پسپۆڕان جەخت دەکەنەوە کە ناسینەوەی نیشانە سەرەتاییەکانی وەک تینووبوونی بەردەوام و دابەزینی کێش، کلیلێکی بنەڕەتییە بۆ کۆنترۆڵکردنی نەخۆشییەکە و ڕێگریکردن لە تێکچوونی ئەندامە گرنگەکانی جەستە وەک دڵ، گورچیلە، و چاوەکان.
فیدراسیۆنی نێودەوڵەتیی شەکرە ڕایگەیاندووه، كه هۆکارە سەرەکییەکانی تووشبوون بە جۆری دووەمی شەکرە پەیوەندیی ڕاستەوخۆیان بە قەڵەوی، کەمبوونی چالاکیی جەستەیی، و پەیڕەوکردنی سیستەمی خۆراکی ناتەندروستەوە هەیە، لە کاتێکدا جۆری یەکەم بەهۆی هێرشی سیستەمی بەرگریی جەستە بۆ سەر خانەکانی پەنکریاس ڕوودەدات. فیدراسیۆنەکە ڕوونی کردەوە کە چارەسەرە مۆدێرنەکان تەنها لە وەرگرتنی ئەنسۆلین و حەبی ڕێکخەری شەکرە کورت نابنەوە، بەڵکو گۆڕینی شێوازی ژیان، وەرزشکردنی بەردەوام، و کەمکردنەوەی کاربۆهیدرات و شیرینی، بنەمای سەرەکیی چارەسەر و کۆنترۆڵکردنی ئەم دۆخە تەندروستییەن.
ئامارە فەرمییەکان ئاماژە بەوە دەکەن کە لە ئێستادا سەدان ملیۆن کەس لە سەرانسەری جیهاندا لەگەڵ نەخۆشیی شەکرەدا دەژین و پێشبینی دەکرێت ئەم ژمارەیە لە ساڵانی داهاتوودا بە شێوەیەکی بەرچاو بەرزبێتەوە. ئەم گەشەسەندنە خێرایە وایکردووە کە پشکنینی خولیی ڕێژەی شەکر لە خوێندا ببێتە پێویستییەکی تەندروستیی نیشتمانی بۆ پاراستنی سەلامەتیی گشتی.
