"بەرهەمی 8ی تەممووز بۆ چەند کەس بوو؟"

نووسەر و چاودێری سیاسی، هاوژین هادی سوور، لە پێگەی تایبەتی خۆی چەند پرسیارێکی کاریگەر و توند لەسەر ڕووداوەکانی 8ی تەممووزی ناوخۆی یەکێتیی نیشتمانیی کوردستان دەوروژێنێت و ڕایدەگەیەنێت کە "دەبێت هەموو ئەم پرسیارانە وەڵام بدرێنەوە و کاریان لەسەر بکرێت." پرسیارەکانی ناوبراو ڕەهەندی دارایی، ئەمنی و سیاسی لەخۆ دەگرن و تیشک دەخەنە سەر دەرئەنجامەکانی ئەو ڕووداوە لەسەر شاری سلێمانی.

ڕووداوەکانی 8ی تەممووزی ساڵی 2021، وەک وەرچەرخانێکی گەورە لە مێژووی هاوچەرخی یەکێتیی نیشتمانیی کوردستان و دەسەڵاتی سیاسی لە زۆنی سەوز سەیر دەکرێت. لەو ڕێکەوتەدا، هاوسەرۆکایەتی پێشووی حیزبەکە کۆتایی پێهات و گۆڕانکاریی ڕیشەیی لە سەرکردایەتی دەزگا ئەمنییەکانی سلێمانی (دەزگای زانیاری و دژەتیرۆر) کرا. ئەم گۆڕانکارییانە کاریگەری قووڵیان لەسەر هاوسەنگی هێز و دۆخی گشتی شاری سلێمانی و دەوروبەری جێهێشت کە تائێستاش مشتومڕی سیاسی لێدەکەوێتەوە.

هاوژین هادی سوور سەرەتا تیشک دەخاتە سەر سەرەتاکانی داڕشتنی ئەو نەخشە سیاسییە و دەپرسێت:

• "8ی تەممووز لە چ ساتێکەوە پیلانڕێژی بۆ کرا؟"

• "کاراکتەرەکانی 8ی تەممووز کێ بوون؟"

لە بەشێکی دیکەی پرسیارەکانیدا، ئاماژە بە ڕووداوێکی تەمومژاوی ئەمنی دەکات کە پێشتر کەمتر قسەی لەسەر کراوە و دەڵێت:

• "تەقە لە کێ کراو قاچی کێ شکێندرا لەسەر ماددەی هۆشبەر؟"

• "بەرهەمی 8ی تەممووز بۆ چەند کەس بوو؟"

• "چەند نامەرد هاتنە پێشەوە و چەند مەرد لە گۆڕەپانی گەمەکە دوورخرایەوە؟"

• "8ی تەممووز بۆ گیرفان بوو، یان پلە و پایە، یان تەنها نامەردییەک بوو؟"

ناوبراو لە کۆتایی پرسیارەکانیدا، بە توندی سەرنج دەخاتە سەر دۆخی ئێستای شاری سلێمانی و پرسی لێپرسینەوە لەوانەی بەرپرسن لەو دۆخە:

• "چۆن شاری سلێمانی کەوتە بەر لافاوی نامەردی و بەتاڵانبردنی ناوچەکە؟"

• "کێن ئەوانەی هەر دەبێت باجی ئەم کارە بدەن و سلێمانی قەت لێیان خۆش نابێت؟"

 

هاوژین هادی سوور لە کۆتایی نووسینەکەیدا جەخت دەکاتەوە کە ناکرێت ئەم بابەتانە پشتگوێ بخرێن و دەنووسێت: "هموو ئەم پرسیارانە دەبێت وەڵام بدرێنەوە و کاریان لەسەر بکرێت."