150 کارمەندی کوردسات بێ مووچە ماونەتەوە

کێشەیەکی دارایی گەورە لە کەناڵی کوردسات سەرهەڵدەدات و شاناز ئیبراهیم ئەحمەد بە دەستوەردان و خواردنی پاره‌ و شایسته‌ داراییه‌كانی کارمەندان تۆمەتبار دەکرێت.

ئەمڕۆ سەرچاوەیەکی ئاگادار بە پایته‌خت میدیای ڕاگەیاند، بە بڕیاری شاناز ئیبراهیم ئەحمەد، مووچەی 6 مانگی بەشێکی زۆری کارمەندانی کەناڵی کوردسات خوراوە و پێیان نەدراوە. ئەم دەستوەردانە لە کاتێکدایە کە دێرین لەتیف ڕەشیدی کوڕی، بەڕێوەبەری کەناڵەکەیە و زۆر جار دایکی کاروبارەکانی بۆ بەڕێوە دەبات.

بەپێی زانیارییەکانی پایته‌خت میدیا، ژمارەی ئەو کارمەندانەی کە مووچەکانیان پێ نەدراوە زیاتر لە 150 کەسە و لە تەواوی نووسینگەکانی کەناڵەکە لە شار و شارۆچکە جیاوازەکان کار دەکەن. سەرچاوەکە ئاماژەی بەوەش کرد کۆی گشتی ئەو پارەیەی لە کارمەندان بڕدراوە دەگاتە نزیکەی 1,000,000 دۆلاری ئەمریکی.

شاناز ئیبراهیم ئەحمەد، هاوسەری دکتۆر لەتیف ڕەشید سەرۆککۆماری پێشووی عێراقە و پێشتریش چەندین جار بەوە تۆمەتبار کراوە کە پارەیەکی زۆری لە ئیدارەی گشتی یەکێتیی نیشتمانیی کوردستان بردووە.