فەرماندەی سێنتکۆم داوای وەستاندنی هێرشەکانیان لە گەرووی هورمز کردووە

بەهۆکاری سنوورداریی دەستکەوتەکانی ئەمریکا لە ڕێگەی بۆردوومانکردنی دەورووبەری گەرووی هورمز، فەرماندەی (سێنتکۆم) پێشنیاری وەستاندنی هێرشەکانی کردووە.

لە زاری دوو سەرچاوەی ئاگادار، پێگەی هەواڵی ئەکسیۆس ئاشكرای کردووە، براد کووپەر، فەرماندەی فەرماندەی ناوەندی هێزەکانی ئەمریکا (سێنتکۆم) پێشنیاری کردووە هێرشەکانی هێزەکانیان لە دەورووبەری گەرووی هورمز ڕابگیرێت، چونکە ئۆپەراسیۆنەکە گەیشتووەتە خاڵی کۆتایی.

بەگوێرەی زانیاری ئەم سەرچاوانەی قسەیان بۆ ئەکسیۆس کردووە، پێشنیازەکەی براد کووپەر و ئامۆژگارییەکانی بەرپرسە سەربازیی و مەدەنییەکان وای کرد دۆناڵد ترەمپ، سەرۆکی ئەمریکا لە ڕۆژی هەینی ڕابردوو فەرمان بە ڕاگرتنی هێرشەکانیان بۆ سەر ئێران بە شێوەیەکی کاتی بدات.

بەرپرسە باڵاکانی ئەمریکا بۆ ترەمپیان ڕوونکردووەتەوە کە دەستەکەوتەکانیان لە گەرووی هورمز بە زەبری هێز (بەتایبەتی هێرشی ئاسمانی) سنووردارە، لە ئێستاشدا کاریگەرییەکی ئەوتۆیان نەماوە.

بۆیەکەمجار دوای 13 شەوی بەردەوام لە  بۆردوومانی هێزەکانی ئەمریکا بۆ سەر ئێران لە گەرووی هورمز، ترەمپ دوای کۆبوونەوەکی لەگەڵ بەرپرسە باڵا سەربازییەکان و ڕاوێژکارەکانی خۆی، فەرمانی بە وەستاندنی بۆردوومانەکان دا، چونکە بەگوێرەی ڕۆژنامەی نیویۆرک تایمز، "عەمباری یەدەگی چەکی وڵاتەکە، بەتایبەتی سیستەمی بەرگری ئاسمانی بەشێوەیەکی بەرچاو کەمی کردووە."

سەبارەت بە قۆناغی دیکەی جەنگ دوای ئەم وەستاندنە کاتییە، فەرماندەی سێنتکۆم گووتی: "ئەگەری ئۆپەراسیۆنێکی فراوان هەیە تا ئەو ئامانجە 20%ـی کە ماوە بۆردوومان بکەن، کە لە ئۆپەراسیۆنی (تووڕەیی داستان ئاسا) لە 28-2-2026 هێزەکانیان نەیانکردە ئامانج.