دۆسیەی د.عەبدولەتیف ئەحمەد دەگاتە بەردەم دادوەر

کۆلێجی زانستە ئیسلامییەکانی زانکۆی سلێمانی ڕێکاری یاسایی و دادوەریی تووند بەرامبەر هەر کەس و لایەنێک دەگرێتە بەر، کە تۆمەتی ناڕەوا هەڵدەبەستێت.

ئەمڕۆ ئەنجوومەنی کۆلێجی زانستە ئیسلامییەکان ڕاگەیەندراوێکی بڵاوکردەوە، دوای بڵاوبوونەوەی چەند تۆمارێکی دەنگی کە دراونەتە پاڵ مامۆستایەکی کۆلێجەکەیان، هەندێک کەس و پەیج نابەرپرسانە و بەر لە دەرچوونی کارەکانی لێژنەی لێکۆڵینەوە و دادگا، بڕیاری کۆتاییان لەسەر بابەتەکە داوە. 

بەپێی ڕاگەیەندراوەکەی کۆلێجی زانستە ئیسلامییەکان، مامۆستایانی زانکۆی سلێمانی و بەتایبەت کۆلێجی زانستە ئیسلامییەکان هۆشیارن و بە هیچ شێوەیەک ناکەونە ژێر کاریگەریی سۆز و پێش کارەکانی لێژنەی لێکۆڵینەوە ناکەون و لەبری لایەنە یاساییەکان بڕیار لەسەر ئەم دۆسیەیە نادەن.

ئەنجوومەنی کۆلێجی زانستە ئیسلامییەکان داوا لە لایەنە کارگێڕی و یاساییەکان و لێژنەی لێکۆڵینەوە دەکات، بە زووترین کات کاری جددی لەسەر دۆسیەکە بکەن بۆ گەیشتن بە ئەنجامی ڕاست و یەکلاکردنەوەی کەسی تاوانبار یان بێتاوان.

لە کۆتاییدا ئەنجوومەنی کۆلێجی زانستە ئیسلامییەکان داوای گرتنەبەری ڕێکاری یاسایی تووند دەکەن بەرامبەر هەر کەس و لایەنێک کە تۆمەتی ناڕەوا دەبەخشێتەوە و سنوور دەبەزێنێت، بە مەبەستی پاراستنی شکۆی زانکۆ، مامۆستایان و قوتابییان.