پەیامی بنەماڵەی یاد سەرباز گەیشت

ئەنجامی پشکنینی دی ئێن ئەی پشتڕاستی کردووەتەوە کە ئێسقانەکان هی یاد سەربازە، لە بەرامبەردا بنەماڵەکەی ڕادەگەیەنن کە پرسە دانانێن.

بنەماڵە و خزمانی گوندی کۆیلێ لە ڕوونکردنەوەیەکدا ئاماژەیان بەوە کردووە، دوای تێپەڕبوونی 26 ڕۆژ بەسەر ڕووداوی ونبوون و ڕفاندنی منداڵەکەیان و دۆزینەوەی ئێسقانەکانی، هەروەها دوای 10 ڕۆژ لە وەرگرتنی نموونەی خوێنی دایک و باوکەکە و ئێسقانەکان، ئەمڕۆ لە لایەن دادگا، ئاسایش و دامەزراوە ئەمنییەکانی ڕاپەڕینەوە بە فەرمی لە ئەنجامەکە ئاگادار کراونەتەوە.

بنەماڵەی یاد سەرباز عەلی جەختیان کردووەتەوە، لە ئێستادا نایانەوێت لەوە زیاتر هیچ لێدوان و زانیارییەک بڵاو بکەنەوە، تەنیا ئەوە نەبێت کە جارێکی دیکە دووپاتی دەکەنەوە کە بە هیچ شێوەیەک پرسە بۆ منداڵەکەیان دانانێن.

لە کۆتایی دا بنەماڵەی یاد سەرباز عەلی سوپاسی پەرۆشی و هاوخەمی سەرجەم هاووڵاتییان و لایەنەکانیان کردووە.