کوێت هەژمارە بانکییەکانی سەرمایەدارێکی ناسراوی وڵاتەکەی بلۆک دەکات
ئێرانییەک چەندین ساڵە خۆی بە ناسنامەی کوێتییەکەوە دەناسێنێت.
حکومەتی کوێت بڕیاری دەستبەسەرداگرتنی هەموو ماڵ و سامانی گەورە بازرگانێکی وڵاتەکەی دەرکرد و ڕەگەزنامەی کوێتیشی لێوەرگرتەوە، دوای ئەوەی لە لێکۆڵینەوەکاندا بۆیان دەرکەوت ئەو کەسە هاووڵاتییەکی ئێرانییە و چەندین ساڵە خۆی بە کەسێکی کوێتی ناساندووە و ناسنامەی کەسێکی دیکەی بەکارهێناوە.
ئەم بڕیارەی حکومەتی کوێت مەحموود حەیدەر و هەموو ئەندامانی خانەوادەکەی دەگرێتەوە، کە چەندین ساڵە وەک یەکێکە لە جەمسەرە ئابووری و میدیاییەکانی ئەو وڵاتە ناسراوە، لە بنەڕەتدا هاووڵاتییەکی ئێرانییە و ناوی ڕاستەقینەی (مەحموود حاجی بەدیعی)ـیە و لە ڕێگەی ساختەکارییەوە ناسنامەی هاووڵاتییەکی کۆچکردووی کوێتی بە ناوی (مەحموود حاجی حەیدەر عەبدوڵڵا)ـی بەکارهێناوە و توانیویەتی دزە بکاتە ناو کایە هەستیارەکانی دەوڵەت و سامانێکی خەیاڵی کۆبکاتەوە.
پێگەی ئەم بازرگانە لە چوارچێوەی دەوڵەمەندییەکی ئاساییدا نەماوەتەوە، پشتگیرییەکی دارایی گەورە و میدیاییشی هەبووە و لە جومگە گرنگەکانی ئابووری کوێتدا، خاوەن دەسەڵات بووە، بەشێوەیەک کۆنترۆڵی بەشێکی زۆر لە وێستگەکانی دابەشکردنی سووتەمەنی کوێتی کردووە و پشکی زۆری لە چەند بانکێکی گەورەی ئەو وڵاتە هەبووە. هاوکات خاوەنی سێ نەخۆشخانەی تایبەت و زنجیرەیەک نۆرینگەی پزیشکی بووە و کۆمپانیاکانی بەرپرس بوون لە دابینکردنی زیاتر لە نیوەی دەرمان و ئامێرە پزیشکییەکانی نەخۆشخانەکانی کوێت لە بەهای گرێبەستی ساڵانەیان زیاتر لە نیو ملیار دیناری کوێتی بووە و هەروەها خاوەنی ڕۆژنامە و کەناڵی ئاسمانی و تۆڕی میدیایی و چەندین پێگەی هەواڵی بووە.
ئاشکرابوونی ئەم دۆسیەیە، کاردانەوەی توندی لەسەرجەم ئاستەکاندا لە کوێت بەدوای خۆیدا هێناوە. لەسەر ئاستی سیاسی و پەرلەمانی، کۆدەنگییەکی نیشتمانی دروستبووە لەلایەن ئەندامانی ئەنجوومەنی ئوممەی کوێتەوە بۆ پشتگیریکردن لە ڕێکارەکانی وەزارەتی ناوخۆ و داواکاری گشتی، لەگەڵ داخوازی بۆ فراوانکردنی بازنەی لێکۆڵینەوەکان بۆ ئاشکراکردنی هەموو ئەو بەرپرسانەی پێشوو کە ئاسانکارییان بۆ کردووە.
لەگەڵ ئەوەشدا، بازاڕی دارایی و بۆرسەی کوێت تووشی شۆکێکی متمانە و شڵەژانی گەورە بووە، بە جۆرێک پشکەکانی سەرجەم ئەو کۆمپانیا و بانکانەی کە بەم بازرگانەوە بەستراونەتەوە ڕووبەڕووی دابەزینی پێوانەیی و فشاری فرۆشتنی بەکۆمەڵ بوونەتەوە لەلایەن وەبەرهێنەرانەوە کە دەترسن سڕکردنی هەژمارە بانکییەکان بۆ کاتێکی نادیار چالاکییە بازرگانییەکانی ئەو دامەزراوانە بە تەواوی پەکبخات.
هاوکات لەگەڵ ئەوەشدا، کاردانەوەکان کەرتی میدیایی و خزمەتگوزارییان گرتووەتەوە، بەهۆی ڕاگرتنی پشتیوانی دارایی، دامەزراوە میدیاییەکانی ئەو بازرگانە، چارەنووسی سەدان کارمەند و ڕۆژنامەنووسی خستووەتە مەترسییەوە، لە کاتێکدا ناوەندە ئەکادیمی و پیشەییەکان ئەم هەنگاوە بە ڕزگارکردنی هۆشیاریی کۆمەڵگەی کوێتی لە ژەهری ڕاگەیاندنی ئاڕاستەکراو لەقەڵەم دەدەن.
ئەو تۆمەتانەی ئاڕاستەی ئەو هاووڵاتییە ئێرانییە کراوە، بریتییە لە ساختەکردنی بەڵگەنامەی فەرمی وەک پاسپۆرت و ناسنامەی نیشتمانی، لەگەڵ دزینی ناسنامەی کەسێکی تر، کە بەپێی یاسای سزادانی کوێت سزای زیندانیی قورسی چەندین ساڵە بۆ خۆی و هەر ئەندامێکی خێزانەکەی کە تێوەگلابێت بەدوای خۆیدا دەهێنێت و سەرجەم ماڵ و سامانەکەشی دەگوازرێتەوە بۆ سەر خەزێنەی دەوڵەت.
