منداڵێک بەهۆی لەبیرچوونەوە لە ناو ئۆتۆمبێلێکدا خنکا
کارەساتێکی دڵتەزێن لە دەربەندیخان؛ منداڵێک لە ناو ئۆتۆمبێلێکدا بەهۆی لەبیرچوونەوە خنکا
منداڵێکی بچووک دوای ئەوەی لە لایەن دایک و باوکیەوە لە ناو ئۆتۆمبێلێکەیان لەبیر کرا، پاش سێ کاتژمێر بە خنکاوی دۆزرایەوە و گیانی لەدەستدا.
ئەمڕۆ سێشەممە ئامانج محەممەد، قایمقامی قەزای دەربەندیخان بە پایتەخت میدیا ڕایگەیاند، دوای نیوەڕۆی ئەمڕۆ ڕووداوێک لە گوندی بانی خێڵانی سەر بە قەزای دەربەندیخان ڕوویدا و بووە هۆی گیانلەدەستدانی منداڵێکی تەمەن 3 ساڵ و نیو.
قایمقامی قەزای دەربەندیخان ئاماژەی بەوە داوە، ڕووداوەکە بەم جۆرە بووە کە دایک و باوکی منداڵەکە پاش گەڕانەوەیان بۆ ماڵەوە، منداڵەکەیان لە ناو ئۆتۆمبێلەکەدا لەبیر چووە و دابەزیون، لە کاتێکدا سەرجەم جامەکانی ئۆتۆمبێلەکە داخرابوون.
ئامانج محەممەد باسی لەوە کرد، خێزانی منداڵەکە بۆ ماوەی 3 کاتژمێر بەدوای منداڵەکەیاندا گەڕاون، بەڵام دواتر کاتێک باوکی دەچێتەوە سەر ئۆتۆمبێلەکەی، منداڵەکەی لە ناوەوە بە خنکاوی دەدۆزێتەوە.
