هۆشداری توند درایە حکومەتی عێراق لەسەر ناردنی مووچە

جێگری سەرۆکی پەرلەمانی عێراق هەر هەوڵێک بۆ بڕینی مووچەی فەرمانبەرانی هەرێمی کوردستان ڕەت دەکاتەوە و جەخت دەکاتەوە کە نابێت بژێوی خەڵک تێکەڵی ململانێ سیاسییەکانی نێوان هەولێر و بەغدا بکرێت.

ئه‌مڕۆ فەرهاد ئەترووشی، جێگری سەرۆکی پەرلەمانی عێراق لە ڕاگەیێنراوێکدا ئاماژەی بەوە کرد کە بەستنەوەی مووچە بە کێشە ژمێریارییەکان، پێشێلکردنی بڕیارەکانی دادگای فیدراڵییە و مووچەی هەرێم وەک هەموو پارێزگاکانی تری عێراق مافێکی دەستوورییە.

ئەترووشی ڕوونی کردەوە کە داهاتی ڕاستەقینەی ئەم دواییەی هەرێم لە نێوان 40 بۆ 50 ملیار دینار بووە و ناوزەدکردنی بە ژمارەی خەیاڵی نادادپەروەرانەیە.

هەروەها داوای کرد کێشە داراییەکان تەنیا لەرێگەی گفتوگۆی هونەری و لە ژێر سایەی دەستووردا چارەسەر بکرێن و هۆشداری دا کە خەونی گەڕانەوەی مەرکەزییەت نایەتە دی.

ئەم هەڵوێستە وەک وەڵامێکە بۆ داواکارییەکەی عەدنان فەیحان، جێگری یەکەمی سەرۆکی پەرلەمان کە داوای ڕاگرتنی ناردنی پارەی بۆ هەرێم کردبوو.