ڕۆژی گەڕانەوەی یەکەم کاروانی حاجییان ئاشکرا بوو

وەزارەتی گواستنەوەی عێراق دەستپێکردنی پڕۆسەی گەڕاندنەوەی حاجییانی لە سعودییەوە ڕاگەیاند. بڕیارە لە ڕێگەی زیاتر لە 100 گەشتی ئاسمانییەوە، میوانانی ماڵی خودا بۆ فڕۆکەخانەکانی عێراق و هەرێمی کوردستان بگوازرێنەوە.

ئه‌مڕۆ مەیسەم سافی، بەڕێوەبەری نووسینگەی ڕاگەیاندنی وەزارەتی گواستنەوەی عێراق ڕایگەیاند، هەموو ئامادەکارییە تەکنیکی و لۆجیستییەکان بۆ جێبەجێکردنی پلانی گەڕانەوەی حاجیان لە سبەی دووشەممەوە بە تەواوی کراون. ئەم هەڵمەتەش بە هەماهەنگیی لەگەڵ دەستەی حەج و عومرە ئەنجام دەدرێت بۆ ئەوەی حاجیان بەبێ گرفت بگەڕێنەوە.

سەبارەت بە هەرێمی کوردستان، پێشتر بەڕێوەبەرایەتی حەج و عومرەی هەرێم ڕایگەیاندبوو کە لە ڕۆژی 4-6-2026 یەکەم کاروانی حاجییان دەگەڕێنەوە.

هاوکات لەگەڵ ئەم پڕۆسەیەدا، وەزارەتی گواستنەوەی عێراق دەستپێکردنی گەشتی ڕاستەوخۆی هەفتانەی نێوان بەغدا و تونسی ڕاگەیاند.

به‌پێی زانیارییه‌كان، ئەم هەنگاوە بەشێکە لە پلانی ستراتیژیی وەزارەت بۆ فراوانکردنی گەشتەکان و بەستنەوەی عێراق بە وڵاتانی باکووری ئەفریقا، دەوڵەتانی عەرەبی و تەواوی جیهان.