دۆسیەی درۆنەکان بەغدا دەهەژێنێت
عێراق چەندین ڕێکاری ئەمنی تووند لەبارەی هێرشی درۆنی، کۆنترۆڵکردنی چەک و هێشتنەوەی لەژێر دەسەڵاتی دەوڵەت دا دەگرێتە بەر.
حکومەتی عێراق ڕێوشوێنە ئەمنی و یاساییەکانی لەبارەی هێرشە درۆنییەکانی سەر هەردوو وڵاتی سعودییە و ئیمارات تووندتر دەکاتەوە، گوتەبێژی فەرماندەی گشتی هێزە چەکدارەکانی عێراق ڕایگەیاند، لێکۆڵینەوەکان لەم دۆسیەیە بەردەوامن و بەغدا بە هیچ شێوەیەک ڕێگە نادات خاکەکەی ببێتە سەرچاوەی هەڕەشە بۆ سەر وڵاتانی ناوچەکە.
سەباح نوعمان، گوتەبێژی فەرماندەی گشتی ڕایگەیاند، ئەو لێژنە تایبەتەی کە بۆ لێکۆڵینەوە لەو هێرشانە پێکهێنراوە، لەسەر هێڵە و بە شێوەیەکی ڕاستەوخۆ لەگەڵ لایەنە پەیوەندیدارەکانی سعودییە و ئیمارات هاوکاری دەکات بۆ وردبینیکردنی داتا و بەڵگەکان، سەباح نوعمان گوتی: "هەرچەندە وادەیەکی دیاریکراو بۆ کۆتایی هاتنی لێکۆڵینەوەکان دانەنراوە، بەڵام کاتێک وردکارییەکان تەواو بوون ئەنجامەکان بە شەفافی بۆ ڕای گشتی بڵاودەکرێنەوە".
عێراق پەیامێکی هۆشداری تووند ئاراستەی ئەو لایەنانە دەکات کە دەیانەوێت سەربەخۆ بجوڵێنەوە، گوتەبێژی فەرماندەی گشتی جەختی کردەوە کە ڕێگە بە هیچ هێزێک نادرێت بڕیاری سیاسی و سەربازی لەبری دەوڵەت بدات و گوتی: "هەر لایەن یان کەسێک تێوەگلانی لەو هێرشانەدا بسەلمێنرێت، وەک هەڕەشە بۆ سەر ئاسایشی نەتەوەیی عێراق مامەڵەی لەگەڵ دەکرێت و بەپێی یاسای دژە تیرۆر سزا دەدرێت."
سەبارەت بە دۆخی ناوخۆ، حکومەتی عێراق پرسی کۆنترۆڵکردنی چەک و هێشتنەوەی لەژێر دەسەڵاتی دەوڵەتدا وەک ستراتیژییەتێکی ئەمنیی کارا دەبینێت، نەک تەنها دروشمێکی سیاسی، بۆ جێبەجێکردنی ئەمەش چەندین پلانی مەیدانی دەستیان پێکردووە کە گرنگترینیان ئەمانەن:
- چاکسازیی ڕیشەیی لە دابەشبوونی هێزە ئەمنییەکاندا.
- نوێکردنەوەی تەواوی داتابەیسی چەکەکان لە سەرانسەری وڵاتدا.
- تووندکردنی چاودێریی تووندی سنوورەکان و ئاسمانی عێراق بۆ ڕێگریکردن لە هەر جووڵەیەکی نایاسایی.
