ئێران باج بەسەر کۆمپانیا ئەمریکییەکان دەسەپێنێت

 
کۆماری ئێران هەنگاوێکی نوێ دەنێت بەرەو توندکردنی کۆنترۆڵی خۆی بەسەر هێڵەکانی گواستنەوەی زانیاری جیهانیدا، میدیایەکانی ئێران دەڵێن: "تاران بە فەرمی داوا دەکات کۆمپانیا زەبەلاحەکانی تەکنەلۆژیا لە جیهاندا باج و رسومات بدەن لەبەرامبەر تێپەڕبوونی کێبڵەکانی ئینتەرنێتیان بە ژێر گەرووی ستراتیژیی هورمزدا".

 
میدیاکانی ئێران لە زاری بەرپرسانی وڵاتەکەیانەوە بڵاویانکردەوە، کە دەبێت کۆمپانیا گەورەکانی بواری تەکنەلۆژیا وەک "گوگڵ، مێتا، مایکرۆسۆفت و ئەمازۆن" ناچار بکرێن پابەندی یاسا و ڕێساکانی ئێران بن،  هەروەها تاران داوا دەکات مافی تایبەت بدرێت بە کۆمپانیا ئێرانییەکان بۆ سەرپەرشتیکردن، ڕاگرتن و چاککردنەوەی ئەو کێبڵە دەریاییانەی کە بە ناوچەکەدا تێدەپەڕن.

 
ئەم جموجۆڵە نوێیەی ئێران دوای ئەوە دێت کە هەفتەی ڕابردوو، ئیبراهیم زولفەقاری، وتەبێژی بارەگای خاتەم ئەنبیا (کۆنتڕۆڵی ئابووری و پیشەسازی سوپای پاسداران دەکات) لە ڕێگەی پلاتفۆرمی X ڕایگەیاندبوو: تاران لەمەودوا "رسومات و باج بەسەر کێبڵەکانی ئینتەرنێتدا دەسەپێنێت" و ئەمەش وەک مافێکی یاسایی و سەروەریی وڵاتەکەی تەماشا دەکات.