مەسرور بارزانی: هێرشەکانی سەر کوردستان شەرمەزار دەکەین

ئەمڕۆ شەممە، سەرۆکوەزیران مەسرور بارزانی لەسەر هێرشەکانی سەر هەرێمی کوردستان ڕایگەیاند، ئەمە هەوڵە بۆ تێکدانی ئاگربەست و زیان گەیاندن بە ناوچەکە، پێویستە حکومەتی فیدراڵ ڕێوشوێنی کردەیی بگرێتەبەر بۆ کۆتاییهێنان بەم هێرشانە.

دەقی ڕاگەیەندراوی مەسرور بارزانی:

بە توندترین شێوە هێرشەکانی سەر هەرێمی کوردستان شەرمەزار دەکەین کە هەرچەندە ئێمە بەشێکیش نەبووین لەو شەڕە، کەچی هێرشەکان لە ماوەی چەند ڕۆژی ڕابردووشدا هەر بەردەوام بوون.

سەرەڕای ئاگربەست و دانوستانەکان، کەچی بەهۆی هێرشەکانی ئەم چەند ڕۆژانە، پێنج کەس شەهیدبوون و ژمارەیەکی زۆریش بریندار بوون، ئەمەش هەوڵێکە بۆ تێکدانی ئاگربەست و زیان گەیاندنی زیاتر بە ناوچەکەمان.

دووپاتی دەکەینەوە کە پێویستە حکومەتی فیدراڵ ڕێوشوێنی کردەیی بگرێتەبەر بۆ کۆتاییهێنان بەم هێرشانە و داوا لە هاوبەشە نێودەوڵەتییەکانمان دەکەین کە کەرەستەی پێویست بۆ پاراستنی هاووڵاتییانی کوردستان و ژێرخانی وزە ، لەم هەڕەشە بەردەوامانە دابین بکەن.

مەسرور بارزانی
سەرۆکی حکومەتی هەرێمی کوردستان 
2026/4/18