دڵنیایی لە خۆراکی پێویست دەدرێت
بەشی 6 مانگ خۆراک لەبازاڕەکانی هەرێمی کوردستان هەیە
دوای دروستبوونی شەڕی ئێران و ئەمریکا، بینینی مووشەکەکانی ئێران لەسەر ئاسمانی کوردستان خەڵکێکی زۆر بۆ مەبەستی کڕینی خۆراک ڕوویان لە ماڕكێت و بازاڕەکان کردووە.
کەمێک لەمەوبەر نەوزاد شێخ کامیل، بەڕێوەبەری گشتیی بازرگانی هەرێمی کوردستان بە پایتەخت میدیای ڕاگەیاند، بەهۆی شەڕەوە ئەگەر خۆراک لە وڵاتانی درەوە نەیەت، ئەوا بەشی 2 مانگ بەشەخۆراکی پێویست لە کۆگا حکومییەکان هەیە.
نەوزاد شێخ کامیل دووپاتی کردەوە، لە نزیکەوە چاودێری کۆگاکانی کەرتی تایبەتییان کردووە کە بەشی 6 مانگ خۆراکی پێویست هەیە و مەترسی نییە.
بەڕێوەبەری گشتیی بازرگانی هەرێم جەختی لەوە کردەوە، لیژنەکانی چاودێرییان ڕاسپاردووە بۆ چاودێریکردنی بازاڕ بەتایبەتی بۆ کاڵا خۆراکییەکان ڕێگە نەدەن بە بەرزکردنەوەی نرخ و هیچ هۆکارێک نییە نرخەکان بەرز بکرێنەوە.
نەوزاد شێخ کامیل داوا لە هاووڵاتییان دەکات، کە مەترسی لەسەر کەمبوونەوەی شتوومەک و خۆراک نییە و با بەپێی پێداویستی ڕۆژانە لە ماڕكێتەکان خۆراک بکڕن.
هەر ماڕكێتێک و بازرگانێک کاڵا بشارێتەوە و یان نرخی خۆراک بەرزبکاتەوە بەڕێوەبەری گشتیی بازرگانی هەرێم دەڵێت: "تووندرین شێوە سزا دەدرێن".
نەوزاد شێخ کامیل هاووڵاتییان ئاگادار دەکاتەوە، لە ڕێگەی هێڵی گەرمی بەڕێوەبەرایەتی چاودێری بازرگانی سەرجەم شارو شارۆچکەکانەوە دەتوانن لە بەرزبوونەوەی نرخی خۆراک ئاگاداریان بکەنەوە.
