بەڕێوەبەرایەتیی پۆلیسی پارێزگای هەولێر ڕایگەیاند، ئەمڕۆ ڕێکەوتی ٢٠ی نیسانی ٢٠٢٦، هێزەکانیان لە حاڵەتێکی کوشتن لە سنووری شارەدێی پیرمام ئاگادار کراونەتەوە. دەستبەجێ تیمەکانی بەشی پۆلیسی پیرمام گەیشتوونەتە شوێنی ڕووداوەکە و دەستیان بە لێکۆڵینەوەی مەیدانی کردووە.

لە کاتی گەیشتنی هێزە ئەمنییەکان بۆ شوێنی مەبەست، دەرکەوتووە کە بەهۆی ڕووداوەکەوە تەرمی کەسێک لەوێ بووە و کەسێکی دیکەش بە سەختی بریندار بووە. تیمەکانی پۆلیس دەستیان بە کۆکردنەوەی بەڵگەکان کردووە و بریندارەکەیان بۆ چارەسەر گواستووەتەوە، هاوکات تەرمەکەش ڕەوانەی پزیشکی دادوەری کراوە.

لێکۆڵینەوە چڕ و وردەکانی پۆلیسی پیرمام لە شوێنی ڕووداوەکە گۆڕانکاریی نوێیان بەخۆیەوە بینی، بە جۆرێک کە پۆلیس ڕایگەیاند لە کاتی بەدواداچوونەکاندا پەردە لەسەر تاوانێکی دیکەی پێشتر ئەنجامدراو لادراوە کە پەیوەندی بەم ڕووداوەوە هەبووە، ئەمەش وایکردووە ڕەهەندەکانی دۆسیەکە فراوانتر ببن.

لە ئێستادا بە بڕیاری دادوەری لێکۆڵینەوەی پیرمام، پەڕاوی یاسایی بۆ ڕووداوەکە کراوەتەوە و لێکۆڵینەوەکان بەردەوامن. پۆلیسی هەولێر دووپاتی دەکاتەوە کە ڕێکارەکان بە وردی دەگیرێنە بەر و یاسا لە بەرانبەر ئەنجامدەرانی ئەم تاوانەدا سەروەر دەبێت.