ئەو کەسانەی دەیانگووت ژنی سەرۆکی فەرەنسا ڕەگەزی نێرە سزا دران

دادگەی فەرەنسا ئەو 10 کەسەی سزا دا کە دیانگووت، خانمی یەکەمی فەرەنسا ڕەگەزی خۆی گۆڕیوە.

ئەمڕۆ دووشەممە دادگەی تاوانی فەرەنسا 10 کەسی بەتاوانی "گێچەڵی ئەلیکترۆنی" سزادا، دوای ئەوەی دەنگۆی ئەوەیان بڵاوکردەوە، کە گوایە "خاتوو بریگیت، خانمی یەكەمی وڵاتەکە، لە ڕاستیدا ڕەگەزی نێرە و دواتر ڕەگەزی خۆی گۆڕیوە".

سزای ئەو 10 کەسە لە مەشقپێکردنیان لە بارەی هۆشداری "گێچەڵی ئەلیکترۆنی" دەستپێدەکات تا سزای 8 مانگ زیندانی.

تاوانبارەکان لە 8 پیاو و 2 ژن پێکدێت و تەمەنیان لە نێوان 41 بۆ 65 ساڵانە، ئەوان لە تۆڕەکۆمەڵایەتییەکان دەیانگووت: "بریگیت ماكرۆن، هاوژینی ئیمانۆل ماکرۆنی سەرۆکی فەڕەنسا بە ڕەگەزی نێر لەدایک بووە و دواتر ڕەگەزی خۆی گۆڕیوە"، هاوکات جیاوازی 24 ساڵەی تەمەنی بریگیتیان لەگەڵ ماکرۆن بۆ تاوانی"منداڵ بازی" دەگەڕاندەوە."

تیفاین ئۆزیێری، کچی خانمی یەکەمی فەرەنسا، لە دادگە شایەتی دا سەبارەت بەوەی کە ژیانی دایکی زۆر خراپ بووە لەوەتەی لە تۆڕەکۆمەڵایەتییەکان هەراسان دەکرێت، جەختیشی کردەوە کە کاریگەریی ئەم گێچەڵ و هەراسانکردنانە بەسەر هەموو خێزانەکە و تەنانەت نەوەکانی ماکرۆنیشەوە درێژ بووەتەوە.