ژینگه‌ پارێزێك له‌كاتی كووژانه‌وه‌ی ئاگر گیانی له‌ده‌ستدا

دوای ئه‌وه‌ی ئاگرێكی گه‌وره‌ له‌ شاری مه‌ریوانی ڕۆژهه‌ڵاتی كوردستان كه‌وته‌وه‌ و ژینگه‌ پارێزێك له‌كاتی كووژانه‌وه‌ی ئاگره‌كه‌ بریندار ده‌بێت، ئه‌مڕۆ به‌هۆی سه‌ختی برینكه‌ی گیانی له‌ده‌ستدا.

ئه‌مڕۆ هه‌ینی ڕێكخراوی مافی مرۆڤی هه‌نگاو بڵاویكرده‌وه‌، ڕێبین گۆرانی کە بە شێوەی خۆبەخش هەوڵی کوژاندنەوەی ئاگری دارستانی مەریوانی دابوو و بە هۆیە چووبووە حاڵەتی کۆماوە، لە دوای دە ڕۆژ مانەوە لە نەخۆشخانە، گیانی لەدەست دا.

له‌ بڵاوكراوه‌كه‌ی هه‌نگاو هاتووه‌، ڕێبین گۆرانی بە هۆی ئاگرکوژاندنەوە بریندار ببوو، لە نەخۆشخانەی تەوحیدی سنە گیانی لەدەست دا. ناوبراو خەڵکی گوندی ساوای سەر بە شاری مەریوان بوو.

به‌گوێره‌ی زانیارییه‌كان، ڕێبین گۆرانی وەکو خۆبەخش لە کاتی کوژاندنەوەی ئاگرکەوتنەوەی ناوچەی "هانەشێخان و دەرەوران" سەر بە مەریوان ڕووی دابوو، بریندار بووه‌ و له‌ ڕۆژی سێشه‌ممه‌وه‌ ته‌ندروستی تێكچووه‌ و چووه‌ته‌ حاڵه‌تی كۆماوه‌.