نرخی نان لە ئێران بەڕێژەی ٪50 بەرزبووەتەوە

لەدوای شەڕی ئێران و ئیسرائیلەوە نرخی پێداویستییەکان و بەتایبەت نان گرانتر بووە. 

نرخی خۆراک و پێداویستیی ڕۆژانەی خەڵک لە ئێران تا دێت گرانتر دەبێت و لە دوای شەڕی 12 ڕۆژەی ئێران و ئیسرائیلیشەوە ڕێژەی هەڵاوسان لە وڵاتی ئێران زیاتر بەرز بووەتەوە.

زۆربەی خەڵکی ئێران لە شار و ناوچە جیاجیاکانی ئەو وڵاتە بەرانبەر گرانبوونی نرخی نان ناڕەزایەتی دەردەبڕن و بەرپرسی یەکێتی نانەواخانەکانی تارانیش ڕایگەیاندووە، بەهۆی گرفتی پەیوەندیدارەوە نرخی نان گران بووە و گوشارێکی یەکجار زۆر کەوتووەتە سەر خەڵک، لە لایەکی دیکە نانەواخانەکانی ئێران باس لە گرانبوونی ئارد و مووچەی کرێکاران دەکەن و گرانبوونی نرخی نان بۆ ئەوە دەگەڕێننەوە، کە دوای شەڕی 12 ڕۆژەی ئیسرائیل، هەڵاوسانەکان لە ئێران زیاتر بوون و بەمەش نرخی نان بەرزتر بووەتەوە. 

هاوکات فاتمە موهاجەرانی، گوتەبێژی حکومەتی ئێران لە کۆنفڕانسێکی ڕۆژنامەوانیدا ڕایگەیاند، پێکهاتەی سەرەکی لە پێداویستیی ڕۆژانەی خەڵکی ئێران بە گشتی نان و ئاردە و نرخی ئاردیش بەرز بووەتەوە، هەر بۆیەش هۆکاری گرانبوونی نان ئاشکرایە، هەروەها لە لایەکی دیکەوە مووچەی کرێکارانی نانەواخانەکان و بیمەی ئەوان زیادی کردووە، بۆیە ئاساییە ئەگەر نان گرانتر بێت.