قاسەیەکی دزراو بە بڕێک زێڕ و 66 هەزار دۆلار دۆزرایەوە

لە ناوچەیەکی عێراق، قاسەیەک دزراوە دواتر بەبێ ئەوەی بتوانن بیکەنەوە، فڕێی دەدەن، لە کاتێکدا زێڕ و پارەی تێدا بووە.

ئەمڕۆ یەکشەممە، وەزارەتی ناوخۆی عێراق ڕایگەیاند، قاسەیەکی فڕێدراویان لە ناوچەی کازمییە دۆزیوەتەوە، کە قاسەکە 38 بازنی زێڕ، 8 ملوانکەی زێڕ و 66 هەزار دۆلاری ئەمریکی تێدا بووە.

بە گوێرەی زانیارییەکانی پۆلیس، دوای لێکۆڵینەوە دەرکەوتووە قاسەکە لە ماڵی هاووڵاتییەک لە هەمان ناوچە دزراوە و دواتر لە کۆگایەک فڕێ دراوە.

 
لە ئێستادا زێڕ و پارەکە رادەستی نووسینگەی بەرەنگاربوونەوەی تاوانی کازمییە کراون بۆ گرتنەبەری رێکاری پێویست.