پۆلیسی ئاکرێ دەستگیرکردنی چوار تۆمەتباری لە دوو دۆسیەی جیاوازی دزیکردن و هەڕەشەکردن بە ناوی دەزگا ئەمنییەکانەوە ڕاگەیاند.
ئەمڕۆ بەڕێوەبەرایەتی پۆلیسی قەزای ئاکرێ ڕایگەیاند، تیمەکانی نەهێشتنی تاوانی سیپە دوو کەسیان بە تۆمەتی دزینی 5300 دۆلاری ئەمریکی دەستگیر کردووە. لە دۆسیەیەکی تریشدا دوو تۆمەتباری تریان بە تۆمەتی هەڕەشەکردن و وەرگرتنی پارە لە هاووڵاتییەک بە ناوی دامەزراوە ئەمنییەکانەوە دەستبەسەر کردووە.
لە دۆسیەی یەکەمدا، دوای تۆمارکردنی سکاڵای دزیکردن لە گەڕەکێکی ناوەندی ئاکرێ، تۆمەتبارێکی مێینە بە ناوی (ج. خ. ز) تەمەن 25 ساڵ دەستگیر کرا. ناوبراو دانی بەوەدا نا کە هاوکاریی کەسێکی تری کردووە بۆ ئەنجامدانی تاوانەکە، بەوپێیەی خزمایەتی لەگەڵ ماڵی سکاڵاکاردا هەبووە.
پۆلیسی ئاکرێ بە هاوئاهەنگی لەگەڵ پۆلیسی قەزای شێخان توانی تۆمەتباری سەرەکی بە ناوی (ب. ج. ع) تەمەن 26 ساڵ لە شارەدێی قەسرۆک دەستگیر بکات. دادوەری لێکۆڵینەوەی ئاکرێ بەپێی ماددەی 443 لە یاسای سزادانی عێراقی هەردوو تۆمەتبارەکەی ڕاگرتووە.
لە دۆسیەی دووەمدا، دوو تۆمەتبار بە ناوەکانی (ا. م. ی) تەمەن 40 ساڵ و (س. ک. ح) تەمەن 33 ساڵ دەستگیر کران. ئەو دوو کەسە بە ناوی دەزگا ئەمنییەکانەوە و بە بیانووی چارەسەرکردنی کێشەیەک، هەڕەشەیان لە هاووڵاتییەک کردووە و بڕێکی زۆر پارەیان لێ سەندووە.
بە بڕیاری دادوەری لێکۆڵینەوە، ئەو دوو تۆمەتبارەش بەپێی ماددەی 452 لە یاسای سزادان ڕاگیراون و لێکۆڵینەوە لەگەڵیاندا بەردەوامە. دەزگا ئەمنییەکانی هەرێمی کوردستان لە چەند مانگی ڕابردوودا چاودێرییەکانیان بۆ سەر ئەو باند و کەسانە چڕ کردووەتەوە کە ناوی هێزە ئەمنییەکان بۆ بەرژەوەندیی تایبەتی بەکار دەهێنن.
