وەزارەتی خوێندنی باڵا و توێژینەوەی زانستیی هەرێمی کوردستان بڕیاری دا ماوەی پڕکردنەوەی فۆڕمی زانکۆلاین بۆ 48 کاتژمێری تر درێژ بکاتەوە، ئەمەش وەک دوا مۆڵەت بۆ ئەو دەرچووانەی پۆلی 12 کە تا ئێستا داواکارییان پێشکەش نەکردووە.
ئەمڕۆ وەزارەتی خوێندنی باڵا و توێژینەوەی زانستی لە ڕاگەیەندراوێکی فەرمیدا بڵاوی کردەوە، لە پێناو بەرژەوەندیی گشتی و پێدانی دەرفەت بەو قوتابییانەی بە هەر هۆکارێک بێت فۆڕمەکەیان تەواو نەکردووە، دەرگای سیستەمەکە تا کاتژمێر 12:00ی شەوی شەممە لە ڕێکەوتی 2026/9/26 بە کراوەیی دەمێنێتەوە.
بەپێی ئاماری وەزارەتەکە، تا ئێستا 70%ی دەرچووانی ئەمساڵ داواکارییەکانیان تۆمار کردووە، هەروەها ئەم بڕیارە دەرچووانی خوێندنگە نێودەوڵەتییەکان و پیشەیییەکانیش دەگرێتەوە.
وەزارەتی خوێندنی باڵا هۆشداریی دا کە ئەمە دوا دەرفەتە و چیتر ماوەی زانکۆلاین درێژ ناکرێتەوە، بۆیە پێویستە دەرچووان لە ماوەی ئەم 48 کاتژمێرەدا پەلە بکەن لە پڕکردنەوەی زانیارییەکانیان.
ساڵانە دوای ڕاگەیاندنی ئەنجامەکانی تاقیکردنەوە گشتییەکانی قۆناغی 12ی ئامادەیی لە هەرێمی کوردستان، دەرچووان لە ڕێگەی سیستەمی ئەلیکترۆنیی زانکۆلاینەوە بەپێی نمرە و کۆنمرەکانیان بەسەر زانکۆ و پەیمانگە حکوومییەکاندا دابەش دەکرێن.
