بۆمبی پاڵەوانیەتی ئەمریکا جۆکۆڤیچ لە یەکەم یارییدا ماڵئاوایی کرد

لە یەکێک لە گەورەترین سوپرایزەکانی مێژووی تێنسی سەرزەوی و پاڵەوانیەتی ئەمریکای کراوە (US Open)، نۆڤاک جۆکۆڤیچی ئەستێرەی سڕبی و هەڵگری 24 نازناوی گراند سلام، لە قۆناغی یەکەمدا دووچاری دۆڕانێکی چاوەڕواننەکراو بووەوە و ماڵئاوایی لە پاڵەوانیەتییەکە کرد.

جۆکۆڤیچی تەمەن 39 ساڵ، لە یارییەکی ماراسۆنیدا کە 4 کاتژمێر و 36 خولەکی خایاند، بەرامبەر ماریانۆ ناڤۆنی یاریزانی ئەرجەنتینی و ڕیزبەندی 49ـی جیهان، بە ئەنجامی (3-2 کۆمەڵە: 6-7، 7-5، 6-4، 2-6، 1-6) دۆڕا.

ئەمە یەکەمجارە لە دوای 20 ساڵ (لە ساڵی 2006ـەوە) کە جۆکۆڤیچ لە قۆناغی یەکەمی پاڵەوانیەتییەکی گراند سلامدا دەربکرێت. لە کاتی یارییەکەدا جۆکۆڤیچ تووشی کێشەی جەستەیی و هێڵنجدان و ئازاری پشت بووەوە، کە ڕێگەی پێنەدا ئاستی ڕاستەقینەی خۆی پێشکەش بکات.

دوای یارییەکە، جۆکۆڤیچ ڕایگەیاند: "هەستێکی زۆر خراپم لەسەر یاریگاکە هەبوو. ئەمساڵ لە زۆربەی یارییەکاندا تووشی کێشەی تەندروستی و ڕشانەوە دەبووم و جەستەم بەرگەی نەدەگرت. بەڕاستی هیچ چێژم لە خولەکە و لەم یارییە وەرنەگرت."

بەم دۆڕانە، خەونی جۆکۆڤیچ بۆ بەدەستهێنانی 25ـەمین نازناوی گراند سلام لەم وەرزی پاڵەوانییەتی ئەمریکا کۆتایی هات.