عێراق؛ دەروازەی نوێ بۆ هەناردەی نەوت دەدۆزێتەوە

کۆمپانیای پاڵاوگەکانی باشوور ستراتیژییەکی نوێ بۆ هەناردەکردنی سووتەمەنیی زیادە پەیڕەو دەکات و بۆ تێپەڕاندنی ئاستەنگە ئەمنییەکانی کەنداو، پەنا بۆ دەروازە وشکانییەکان دەبات.

ئەمڕۆ حوسام حوسێن وەلی، بەڕێوەبەری گشتیی کۆمپانیای پاڵاوگەکانی باشوور ڕایگەیاند، بە هەماهەنگی لەگەڵ کۆمپانیای نیشتمانیی سۆمۆ، دەروازە وشکانییەکانی باکووریان بۆ هەناردەکردنی 'نەوتی سووک' و 'زەیتی سووتەمەنی' هەڵبژاردووە.

ئاماژەی بەوەش کردووه‌، ڕۆژانە 6 هەزار مەتر سێجا بەنزین بەرهەم دەهێنن و ئاستی پاڵاوتنی گشتی گەیشتووەتە 250 هەزار بەرمیل لە ڕۆژێکدا، هەرچەندە بەهۆی شەپۆلی گەرماوە کەمێک ئاستی کارکردنیان بۆ پاراستنی یەکەکان دابەزاندووە.

کەرتی نەوتی عێراق بەهۆی گۆڕانکارییە جیۆپۆلەتیکییەکان و بەرزبوونەوەی پلەی گەرمی، ڕووبەڕووی تەحەدای جۆراوجۆر دەبێتەوە و پاڵاوگەکان ناچارن بۆ پاراستنی کێبڕکێی بازرگانی، سیستەمی هەناردەکردن و کارکردنیان بگۆڕن.