نابێت خەڵک بێزار بکرێت
خواردنەوەی کحوول لە دەوروبەری بەنداوی سەروچاوە قەدەغە کرا.
سەرۆکایەتیی شارەوانیی سەروچاوە خواردنەوەی ماددە کحولییەکان لە دەوروبەری بەنداوی سەروچاوە بە هەموو شێوەیەک قەدەغە دەکات و ڕێکاری پێویست دەگرێتە بەر.
سەرۆکایەتیی شارەوانیی سەروچاوە بڵاوی کردەوە، بەنداوی سەروچاوە شوێنێکی گشتییە و مافی هەر هاووڵاتییەکە بۆ کات بەسەربردن و خۆفێنککردنەوە سەردانی بکات، بۆیە ڕێگە نادرێت هیچ کەسێک ببێتە هۆی بێزارکردنی دەوروبەری.
بەپێی ڕاگەیەندراوەکەی سەرۆکایەتیی شارەوانیی سەروچاوە، لەپێناو پاراستنی گیانی سەرجەم گەشتیار و هاووڵاتییان، خواردنەوەی کحوول لە دەوروبەری بەنداوەکە بەتەواوی قەدەغە کراوە.
لە کۆتاییدا سەرۆکایەتیی شارەوانیی سەروچاوە داوا لە هاووڵاتییان دەکات، لە کاتی بینینی هەر حاڵەتێکی سەرپێچیدا، لایەنە پێوەندیدارەکان و ئەمنییەکان ئاگادار بکەنەوە تاوەکو ڕێکاری یاسایی بگرنە بەر.
بەنداوی سەروچاوە لە سنووری قەزای ڕانیە، جگە لە سوودە کشتوکاڵییەکانی، سەیرانگایەکی دیاری ناوچەکەیە و لە وەرزەکانی بەهار و هاویندا ڕۆژانە دەیان خێزان بۆ کات بەسەربردن ڕووی تێ دەکەن.
