جووتیارێکی کورد لە کەرکووک زیندانی دەکرێت

جووتیارێکی کورد لە کەرکووک دوای دوو مانگ لە داگیرکردنی خانووەکەی سزای 6 مانگ زیندانی بۆ دەرکرا.

ئەمڕۆ دووشەممە بەتۆمەتی زیادەڕۆیی دەوڵەت، لەسەر سکاڵایەکی سوپای عێراق هاووڵاتییەکی دانیشتووی گوندی تۆپزاوە بەناوی (ئیبراهیم خەلیل) لە دادگای کەرکووک سزای 6 مانگ زیندانی بۆ دەرچوو.

پایتەخت میدیا زانییویەتی ساڵی ڕابردوو سوپای عێراق سکاڵای لە 18 جووتیار و هاووڵاتی تۆپزاوە تۆمار کردووە و یەکێک لەو جوتیارانە بەناوی مام ئیبراهیم بوو بەتۆمەتی ئەوەی کە ئەو زەوییەی خانووەکەی مام ئیبراهیم لەسەرکراوە موڵکی سوپای عێراقە و بەو هۆیەوە ئەمڕۆ دادگا بڕیاریدا بەزیندانیکردنی بۆ ماوەی 6 مانگ بەشێوەی (ایقاف تنفیذ)واتە لەدەرەوە سزاکەی تەواو دەکات.

خانەوادەی مام ئیبراهیم بۆ پایتەخت میدیا قسەیان کرد و گووتیان: مام ئیبراهیم خاوەنی تاپۆی ڕەشی زەوی و خانووەکەیە، سەرەڕای ئەوەش بەپێی یاسا مافی خۆمانە، بڕیارەکانی ڕژێمی پێشووی بەعس لەپەرلەمانی عێراق هەڵوەشایەوە و لەبری ئەوەی خانووە داگیرکراوەکەمان پێ بدەنەوە هاتن و سزای مام ئیبراهیمان دا.