زیاتر لە 40 دۆنم دارستان و پوش و پاوان سووتان
وردهكاریی سووتان و كۆنتڕۆڵكردنی 40 دۆنم زهوی دارستانەکانی پێنجوێن لێره بخوێننهوه.
پۆلیسی دارستان و ژینگەی سلێمانی لە هەڵمەتێکی چڕدا توانییان کۆنترۆڵی دوو ئاگری گەورە لە سنووری قەزای پێنجوێن بکەن کە بوونە هۆی لەناوبردنی ڕووبەرێکی زۆری دارستان و پاوانی ناوچەکە.
ئەمڕۆ بەڕێوەبەرایەتی پۆلیسی دارستان و ژینگەی پارێزگای سلێمانی ڕایگەیاند، مەفرەزەکانیان لە دوو شوێنی جیاوازی سنووری پێنجوێن ڕووبەڕووی ئاگرکەوتنەوە بوونەتەوە. بەپێی ڕاگەیەندراوەکە، ئاگری یەکەم لە ناوچەی ناوشاخان کەوتووەتەوە و بووەتە هۆی سووتانی زیاتر لە 10 دۆنم پوش و پاوان و دارستانی سروشتیی سنوورەکە.
لەبارەی ڕووداوی دووەمەوە، پۆلیسی دارستان ئاشکرای کردووە، کە ئاگرەکە لە سنووری گوندەکانی بێستان و هەنگەژاڵ تەشەنەی سەندووە. لەم ڕووداوەدا 30 دۆنم زەوی سووتاوە و مەفرەزەکانی بنکەی گەرمک بە هاوکاری بەرگری شارستانی، ڕێکخراوی ملەکەوە و دانیشتووانی ناوچەکە توانیویانە دوای هەوڵێکی زۆر ئاگرەکە بکوژێننەوە.
تا ئێستا هۆکاری سەرەکیی کەوتنەوەی ئەم ئاگرانە بە نادیاری ماوەتەوە و تیمەکانی پۆلیس لێکۆڵینەوەی وردیان لەوبارەیەوە دەست پێ کردووە. لایەنە پەیوەندیدارەکان داوا لە هاووڵاتییان و گەشتیاران دەکەن لە کاتی سەردانیکردنی ناوچە شاخاوییەکاندا ئاگاداری پاراستنی ژینگە بن و هۆکار نەبن بۆ دروستبوونی کارەساتی ژینگەیی.
