ڕاگەیەندراوی بەپەلەی مامۆستایانی زانکۆی سلێمانی

بەشێک لە مامۆستایانی زانکۆی سلێمانی لەسەر دۆسییەکەی د. عەبدولەتیف ئەحمەد هاتنە دەنگ و داوای دوورخستنەوەی  دەکەن.

ئەمڕۆ کۆمەڵێک لە مامۆستایانی زانکۆی سلێمانی و وتاربێژانی شارەکە، نامەیەکی تووند و بەپەلەیان ئاراستەی بەرپرسانی سلێمانی کرد و تێیدا تۆمەتی ئابڕووبەرانە لەسەر بنەمای بەدڕەوشتی، دەستتێوەردانی دەرەکی و بەکارهێنانی دامەزراوە ئەکادیمییەکان بۆ مەرامی تایبەتیی دەخەنە پاڵ د. عەبدولەتیف ئەحمەد، ڕابەری سەلەفییەکان و براکانی.

نووسەرانی نامەکە ئاماژە بەوە دەکەن کە لە ساڵانی ڕابردوودا، دەستێکی دەرەکی نامۆ هێنراوەتە کوردستان و بەشێک لە مزگەوت و ناوەندەکانی خوێندنی ئایینی قۆرخ کردووە.

ئەوان د. عەبدولەتیف بە سەرپەرشتیاری ئەم کارانە تۆمەتبار دەکەن و دەڵێن: "لە ساڵی 2015 لەسەر کێشەیەکی ئەخلاقی لەگەڵ ئافرەتێک بە ناوی (چ)، بووەتە هۆی داخستنی پەیمانگەی زانستە ئیسلامییەکان."

لە بەشێکی تری نامەکەدا، سێ تۆمەتی دیاریکراو ڕووبەڕووی د. عەبدولەتیف و براکانی دەکەنەوە:

1 - د. خالدی برای، کە ڕاگری کۆلێژی زانستە ئیسلامییەکانە، تۆمەتبار کراوە بەوەی پێوەندی لەگەڵ ئافرەتێک بە ناوی (ڕ) هەبووە و ئەو ئافرەتە لەبەردەم ئەنجوومەنی کۆلێژدا سەرکۆنەی کردووە.

2- ئەبوبەکری برای، کە خوێندکاری ماستەر بووە، تۆمەتبار کراوە بە گێچەڵی سێکسیکردن بە ژنە خوێندکارێکی هاوپۆلی خۆی و هەڕەشەی بڵاوکردنەوەی دەنگ و نامەکانی لێکراوە.

3 - خودی د. عەبدولەتیف تۆمەتبار کراوە بەوەی بە پاڵپشتی براکەی، پێوەندی ناڕەوای لەگەڵ کچانی بەشی شەریعە دروست کردووە و تۆماری دەنگی لەسەر ئەم بابەتە هەیە.

لە کۆتاییدا، مامۆستایان داوا لە بەرپرسانی سلێمانی دەکەن د. عەبدولەتیف و د. خالدی برای بە هەمیشەیی لە مامۆستایەتی زانکۆ، وتاربێژی و پۆستەکانیان دوور بخرێنەوە و تەواوی ڕێکخراو و ئەکادیمیاکانیان دابخرێن، بۆ ئەوەی ڕێگری لە لەکەدارکردنی ناوی شاری سلێمانی بگیرێت.