ئه‌و گه‌نجه‌ی ته‌رمی گه‌شتیاره‌كه‌ی دۆزییه‌وه‌ خه‌ڵاتكرا

پاش ئەوەی نیوەڕۆی ئەمڕۆ تەرمی ڕوقییە، ئەو کچە گەشتیارە 11 ساڵانەیەی کەربەلا لە ناو ئاوی چەمی زەڵم دۆزرایەوە، گەنجێکی ناوچەکە وەک دەستخۆشی و ڕێزلێنان خەڵات کرا.

ئه‌مڕۆ جێگر هەورامی، بڕی 1,000 دۆلاری ئەمریکی وەک دیاری و پێزانین پێشکەشی گەنجێک بە ناوی یوسف حەسەن سادق کرد، کە توانی تەرمی کچەکە بدۆزێتەوە و کۆتایی بە چاوەڕوانییە تاڵەکانی خێزانەکەی بهێنێت.

ڕوقییە تەمەنی 11 ساڵ بوو و ماوەی 9 ڕۆژ بوو لە کاتی گەشتکردن لەگەڵ خێزانەکەیدا لە سەیرانگای ئەحمەدئاوا خنکابوو. لەو ماوەیەدا تیمەکانی بەرگری شارستانی هەڵەبجە و خەڵکی ناوچەکە بەردەوام لە گەڕان دابوون، تا دواجار نیوەڕۆی ئەمڕۆ توانرا تەرمەکەی لە قووڵایی ئاوەکەدا دەستنیشان بکرێت و دەربهێنرێتەوە.

ئەم خەڵاتە وەک وەفایەک بووە بۆ ماندووبوونی ئەو گەنجەی کە بە کارەکەی توانی ئازاری خێزانە گەشتیارەکە کەم بکاتەوە.