پارتی چاکسازی تورکمان بانگەوازێکی بەپەلە ئاڕاستەی لایەنە سیاسییەکان دەکات

پارتی چاکسازی تورکمان ڕایدەگەیەنێت، چیتر ڕەوا نییە کارەکانی بەرزترین دامەزراوەی یاسادانان و چاودێری لە هەرێمی کوردستان پەکبخرێت، داواش لە سەرجەم هێز و لایەنە سیاسییەکان دەکات بەرژەوەندی باڵای گەل بخەنە سەرووی بەرژەوەندییە حزبییەکان و مێزی گفتوگۆ گەرم بکەنەوە.

ئەمڕۆ چوارشەممە، 17ی حوزەیرانی 2026، پارتی چاکسازی تورکمان بە سەرۆکایەتی عەبدولقادر بازرگان، بانگەوازێکی ئاڕاستەی ڕای گشتی و لایەنە سیاسییەکانی هەرێمی کوردستان کرد. لە بانگەوازەکەدا نیگەرانییەکی قووڵ بەرامبەر بە درێژبوونەوەی دۆخی چەقبەستووی سیاسی و دواخستنی کاراکردنەوەی پەرلەمانی کوردستان نیشان دراوە.

پارتی چاکسازی تورکمان جەخت لەسەر پرسی جیاکردنەوەی ئەرکەکان دەکاتەوە و ڕایدەگەیەنێت: "دروست نەبوونی کابینەی نوێی حکوومەت نابێت و نابێت ببێتە هۆکاری وەستاندنی کارەکانی پەرلەمان." ئاماژە بەوەش دەکەن کە هەرێمی کوردستان پێویستی بەوەیە پەرلەمان لە ئێستاوە دەست بە ڕێکخستنی کارە ناوخۆییەکانی و پێکهێنانی لێژنەکان بکات.

لە بەشێکی تری بانگەوازەکەدا هاتووە، بەردەوامبوونی ئەم دۆخە چەقبەستووە تەنها زیان بە بژێوی، ژیانی هاووڵاتیان و پرۆسەی حوکمرانی لە هەرێم دەگەیەنێت، بۆیە داوا دەکەن بەرژەوەندی باڵای گەل بخرێتە سەرووی هەموو بەرژەوەندییەکی تری حزبی و کەسییەوە.

لەکۆتاییدا، سەرۆکی پارتی چاکسازی تورکمان داوای لایەنەکان دەکات بە کاتێکی خێرا و بەرپرسیارانە بگەنە ڕێککەوتن بۆ پێکهێنانی کابینەی نوێ و کاراکردنەوەی تەواوی دامەزراوە دەستوورییەکان، بۆ ئەوەی ڕێگری لە داڕمانی زیاتری کات و دەرفەتەکان بکرێت.