تەرمی پیرۆزی ڕوقییە بە مەراسیمێکی شایستە لە مۆنۆمێنتەوە بەڕێدەکرێت
سبەی لە مەراسیمێکی شایستە و شکۆدار تەرمی ڕوقییە بەرەو کەربەلا بەڕێدەکرێت
پارێزگای هەڵەبجە ئاگاداری هاووڵاتییان دەکاتەوە کە سبەی تەرمی ڕوقییە، کچە 11 ساڵانەکەی سەرچاوەی زەڵم لە مەراسیمێکی شایستە و شکۆدار بەڕێ دەکرێت بۆ زێدی خۆی.
پارێزگای هەڵەبجە ڕایگەیاند، تەرمی پیرۆزی ڕوقییە بە مەراسیمێکی شکۆدار و شایستە بە ئامادەبوونی نوخشە ناسح، پارێزگاری هەڵەبجە بەڕێدەکرێت، هەروەها بڕیارە کاتژمێر 07:00ـی بەرەبەیانی پێنجشەممە، تەرمی ڕوقییە ئەو کۆرپە و میوانەی شاری هەڵەبجە، بەرەو زێدی خۆی بۆ کەربەلا بەڕێ بکرێت.
پارێزگای هەڵەبجە لە ڕاگەیەندراوەکەدا ئاماژەی بەوەش کردووە، مەراسیمەکە لە مۆنۆمێنتی شەهیدانی هەڵەبجەوە دەستپێدەکات و بەڕێدەکرێت بەرەو قەزای خورماڵ، هەروەها لەوێوە بەڕێدەکرێت بۆ قەزای سەیدسادق پاشان بەیاوەری شاندی پارێزگا بەڕێدەكرێت بەرەو زێدی خۆی لە شاری کەربەلای پیرۆز .
