تۆمەتبارە نەخۆشە

پۆلیسی هەولێر تۆمەتبارێکی دەستگیرکرد کە لە شەقامێکی شارەکەدا هێرشی کردبووە سەر هاووڵاتییەکی بەتەمەن و ڤیدیۆکەی دەنگدانەوەی زۆری لێکەوتبووەوە.

ئەمڕۆ یەکشەممە بەڕێوەبەرایەتیی پۆلیسی پارێزگای هەولێر ڕایگەیاند، هێزەکانیان توانیویانە دەستبەجێ ئەو تۆمەتبارە دەستگیر بکەن کە هێرشی کردبووە سەر هاوڵاتییەکی بەتەمەن.

پۆلیسی هەولێر دەڵێت: گرتەیەکی ڤیدیۆیی لە تۆڕە کۆمەڵایەتییەکاندا بڵاوبووەوە و تێیدا دەرکەوت کە کەسێک لە یەکێک لە شەقامەکانی شاری هەولێر، ڕێگری لە هاووڵاتییەکی بەتەمەن دەکات. لە کاتی گەڕانەوەی بۆ ماڵەوە و هێرشی دەکاتە سەر، کە ئەم دیمەنە ناڕەزایەتی و دەنگدانەوەیەکی زۆری لەناو هاووڵاتییاندا لێکەوتەوە.

پۆلیسی هەولێر ئاماژەی بەوە کردووە،  لە ڕێگای تیمەکانیان لە بەشی پۆلیسی فریاکەوتن، تواندرا تۆمەتبار بە ناوی (أ-ف-د) دەستگیر بکرێت. 

لە درێژەی ڕاگەیەندراوەکەی پۆلیسی هەولێر هاتووە، لێکۆڵینەوە سەرەتاییەکانیشدا دەرکەوتووە کە تۆمەتباری ناوبراو نەخۆشیی دەروونیی هەیە.

لەکۆتایی دا پۆلیسی هەولێر جەختی لەوە کردەوە، لە ئێستادا پەڕاوی لێکۆڵینەوەی بۆ ڕێکخراوە و بە بڕیاری دادوەری لێکۆڵینەوەی هەولێر، تۆمەتبارەکە بەپێی مادەی 413 لە یاسای سزادان ڕاگیراوە.