ههولێر؛ شۆفێران ئاگادار دهكرێنهوه
گەورەترین شەقامی هەولیر نۆژەندەکرێتەوە؛ ئاگاداربن ئەم ماوەیە هاتووچۆی تێدا مەکەن.
سەرۆکایەتیی شارەوانی هەولێر بەهۆی دەستپێکردنی پڕۆژەیەکی بەرفراوانی نۆژەنکردنەوە و قیرتاوکردن، چەند بەشێکی سەرەکی لە شەقامی 120 مەتریی خێرا بەڕووی هاتووچۆدا دادەخات و داوا لە شۆفێران دەکات ڕێگای جێگرەوە بەکاربهێنن.
ئەمڕۆ پێنجشەممە کارزان عەبدولهادی، سەرۆکی شارەوانی هەولێر ڕایگەیاند، لە پێناو چاککردنەوەی شەقامەکان و بەڕێوەچوونی کارەکان بە خێرایی، لە ئەمڕۆوە پڕۆسەی قیرتاوکردن لەسەر شەقامی 120 مەتریی خێرا دەستپێدەکات.
بە دیاریکراوی لە سووڕانەوەکەی بەرەو شاری ئیتاڵیی 2 لەسەر شەقامی 120 مەتری، هەروەها لە نێوان بەرزەپردی بەحرکە بۆ بەرزەپردی پیرمام بە تایبەتی لە بەردەم گوندی ئارام تاوەکو بەرزەپردی پیرمام.
شارەوانی هەولێر داوا لە سەرجەم هاووڵاتییان و شۆفێران دەکات، بۆ دوورکەوتنەوە لە دروستبوونی قەرەباڵغی و پەککەوتنی کارەکانیان، ڕێگای جێگرەوە بۆ هاتووچۆ بەکاربهێنن و هاوکار بن لە خێرا تەواوکردنی ئەم پڕۆژە گشتییەدا.
