ماددەی هۆشبەری بەکارهێناوە و 15بتڵە غازی دزیوە

پاش بەدواداچوونی وردی کامێراکانی چاودێری، پۆلیسی سۆران دزی یەکەمی بتڵە غازەکانی دۆڵی ئالانەی دەستگیرکرد و وردەکاری زیاتر ئاشکرا دەکات.

ئەمڕۆ دووشەممە بەڕێوەبەرایەتیی پۆلیسی سۆران بڵاویکردەوە، پاش ئەوەی دوو هاوڵاتیی لە بنکەی پۆلیسی خەلیفان سکاڵایان لەسەر دزینی 15 بوتڵی غاز، 2 ئامێری چێشتلێنان و سێکوچکەیەکی چێشتخانە لە دوو شوێنی گەشتیاری و کافتریایەکی دۆڵی ئالانە و کوری تەنگ تۆمارکرد، پەڕاوی لێکۆڵینەوە بۆ ڕووداوەکە کرایەوە.

پۆلیسی سۆران باسی لەوە کرد، پاش بەدواداچوونی ورد لە ڕێگەی کامێراکانی چاودێرییەوە، ناسنامەی تۆمەتبارەکە بە ناوی (ڕ . ع . ح) ئاشکرا کرا کە تاوانەکەی لە کاتژمێر 4ی بەیانیدا ئەنجامداوە. 

لە درێژەی ڕاگەیەندراوەکەی پۆلیسی سۆران هاتووە، تۆمەتبارەکە ئۆتۆمبێلێکی جۆری تۆیۆتا کۆرۆلای بەکارهێناوە کە تابلۆکەی لێکردبووەوە و جامەکانی ڕەش کردبوو،  پاشان بە هاوکاریی پۆلیسی هەولێر، تۆمەتبارەکە کە دانیشتووی سنووری هەولێر بوو دەستگیرکرا.

پۆلیسی سۆران ئاشکرای دەکات، لە کاتی لێکۆڵینەوەدا دانی بە تاوانەکەیدا ناوە و دەرکەوتووە کە لە کاتی دزییەکەدا بەکارهێنەری ماددەی هۆشبەر بووە، لە ئێستادا بەپێی ماددەی 446ی یاسای سزادان ڕاگیراوە.