یەکێتی لەبەر پیرۆزبایی کاروباری هاوڵاتییان ڕادەگرێت

یەکێتیی نیشتمانیی کوردستان بەبۆنەی یادی دامەزراندنی حزبەکەیەوە، لەزۆربەی دامودەزگا حکومییەکان، کاروباری هاووڵاتییان ڕادەگرێت و بەرپرس و کادیرانی خۆی بە مەبەستی پیرۆزبایی دەباتە مەڵبەندەکان.

ئەمڕۆ دووشەممە، 1-6-2026 کە هاوکات بوو لەگەڵ ساڵیادی دامەزراندنی یەکێتیی نیشتمانیی کوردستان، بە بڕیاری ئەو حزبە داوا لە هەموو بەرپرس و فەرمانبەرانی دامودەزگاکانی حکومەت، کە کادیری ئەو حزبەن، بە مەبەستی پیرۆزبایی سەردانی مەڵبەند و بارەگا حزبییەکان بکەن.

ئەم بڕیارەی یەکێتی لە هەولێریش بووە هۆی دواخستنی ڕاییکردنی کاروباری بەشێک لە هاووڵاتییان و پەکخستنی دەوامی فەرمی، لەو وەزارەت و فەرمانگە حکومییانەی کە بەرپرسی یەکەمیان یەکێتین، بەتایبەتیش لە دیوانی وەزارەتەکانی خوێندنی باڵا و توێژینەوەی زانستی، کشتوکاڵ و سەرچاوەکانی ئاو و پلاندان.

بەشێک لە هاووڵاتییان کە لە شوێنی دوورەوە بە تایبەتی لە پارێزگاکانی سلێمانی، هەڵەبجە، ئیدارەکانی گەرمیان و ڕاپەڕین بۆ ڕاییکردنی مامەڵەکانیان سەردانی دیوانی ئەو وەزارەتانەیان لە هەولێر کردبوو، بەهۆی ئامادە نەبوونی بەرپرسانی یەکێتییەوە کە سەرقاڵی پیرۆزبایی ساڵیادی دامەزراندنی حزبەکەیان بوون، کارەکانیان دواکەوت و گازاندەیان لە سستی بەڕێوەچوونی کارەکانیانەوە هەبوو.