ئێران ئەم دوو گەنجە کوردەی لەسێدارەدا
ڕێگە نەدراوە خێزانەکانیان چاویان پێبکەوێت؛ کەیسی دوو گەنجی کورد لە ئێران کۆتایی هات.
دەسەڵاتی دادوەری ئێران دوو گەنجی کوردی بە تۆمەتی کردەوەی تیرۆرستی و تێکدانی ئاسایشی وڵات لەسێدارەدا.
ئەمڕۆ پێنجشەممە، ڕێکخراوی مافی مرۆڤی هەنگاو ڕایگەیاند، دوو گەنجی کورد بە ناوەکانی ' ڕامین زلە و کەریم مەعروفپوور'، کە هەردووکیان خەڵکی نەغەدەن، بەتۆمەتی پەیوەندییان بە خزبی دیموکراتی کوردستانی ئێران لەسێدارە دراون.
لەگەڵ لەسێدارەدانی ئەم دوو گەنجە کوردە، سەنتەری ڕاگەیاندنی دادوەری (ئاژانسی میزان نیوز)ـی ئێران هەواڵەکەی پشتڕاستکردەوە و هەردوو گەنجەکەی بە "ئەندامی گرووپی تیرۆرستی، یاخیگەری و تیرۆرکردن" تۆمەتبار کرد.
بەگوێرەی زانیارییەکانی ڕێکخراوی مافی مرۆڤی هەنگاو، سزای لە سێدارەدانی ئەم دوو گەنجە بە نهێنی بەرەبەیانی ئەمڕۆ 21-5-2026 لە زیندانی ناوەندی نەغەدە جێبەجێکراوە، بەبێ ئەوەی پێشوەختە ئاگاداری خێزانەکانیان بکرێنەوە و ڕێگە بدەن بۆ دوایین جار چاویان پێیان بکەوێت.
ڕێکخراوەکە جەخت دەکاتەوە، کە دووبارەبوونەوەی ئەم تۆمەتانە لە دژی چالاکوانە سیاسییەکان لە ئێران، بەزۆرەملێ و لە ڕێگەی ئەشکەنجەدان بەدەست دەهێندرێن.
