تەندروستی جیهانی باری نائاسایی ڕاگەیاند
ئەوەی خەڵک لێی دەترسا سەری هەڵدایەوە؛ داوا لە کۆماری دیموکراتی کۆنگۆ دەکرێت گەشتە نێودەوڵەتییەکانی ڕابگرێت.
ڤایرۆسێکی کوشندە لە ئەفریقا سەری هەڵداوە و بەشێوەیەکی زۆر خێرا بڵاودەبێتەوە.
ئەمڕۆ یەکشەممە، رێکخراوی تەندروستی جیهانی باری نائاسایی ڕایگەیاند و ئاشكرای کرد، ڤایرۆسێکی کوشندە بە ناوی 'ئیبۆلا' لە کۆماری دیموکراتی کۆنگۆ بڵاوبووەتەوە، کە لە جۆری "بوندیبوگیۆ"ـیە و تا ئێستا هیچ دەرمان یان ڤاکسینێکی پەسندکراوی بۆ نەدۆزراوەتەوە.
بەگوێرەی ڕاگەیەندراوەکەی ئەم رێکخراوە، تا ئێستا نزیکەی 80 کەسی گومانلێکراوی تووشبووی ئەو ڤایرۆسە گیانیان لەدەستداوە و 246 کەسی تووشبووش لە وڵاتەکە تۆمار کراون. هەروەها لە ئۆگاندا دوو حاڵەتی پشتڕاستکراوە دیاری کراون و مەترسیی بڵاوبوونەوەی خێرای ڤایرۆسەکە لەنێو شارەکاندا بوونی هەیە.
رێکخراوی تەندروستی جیهانی هۆشداری داوە کە ئەو کەسانەی بە تووشبوونی ڤایرۆسەکە پشتڕاستکراونەتەوە، دەستبەجێ کەرەنتین بکرێن و ڕۆژانە چاودێری بکرێن، گەشتە ئاسمانییەکانی ناوخۆی وڵات سنووردار بکرێن و هیچ گەشتێکی نێودەوڵەتیش ئەنجام نەدرێت.
ئەمە 17ـمین جارە ڤایرۆسی ئیبۆلا لە ئەفریقا سەرهەڵبداتەوە و بۆیەکەمجار لە ساڵی 1976 سەری هەڵدا. ڤایرۆسەکە یەکێکە لە نەخۆشییە گوازراوە مەترسیدار و کوشندەکان، گیانلەدەستدان پێی دەگاتە 50%، لە رێگەی بەرکەوتن لەگەڵ شلەکانی لەشی کەسی تووشبوو، وەک خوێن و ئارەق، لە مرۆڤێکەوە بۆ مرۆڤێکی دیکە دەگوازرێتەوە و دەبێتە هۆی تێکچوونی خێرای باری تەندروستی، وەک سکچوون، ڕشانەوە، هەڵامەت و خورانی جەستە.
