نێچیرڤان بارزانی: سزادانی جەللادەکەی نوگرەسەلمان سەرکەوتنی دادپەروەرییە

 
نێچیرڤان بارزانی، سەرۆکی هەرێی کوردستان پێشوازی لە بڕیاری دادگا بۆ سزادانی عەجاج تکریتی، یەکێک لە جەللادە ناسراوەکانی زیندانی نوگرەسەلمان دەکات و ڕایدەگەیەنێت، ئەم هەنگاوە جێبەجێبوونی دادپەروەری و کەمترین دڵدانەوەیە بۆ کەسوکاری قوربانیانی ئەنفال.

 
ئەمڕۆ پێنجشەممە، نێچیرڤان بارزانی لە پەیامێکدا ئاماژەی بەوە کرد، سزادانی ئەم تاوانبارە دوای تێپەڕبوونی چەندین ساڵ، پەیامێکی ڕوون و بێپەردەیە بۆ هەمووان کە تاوانەکانی جینۆساید و تاوانە دژە مرۆییەکان بەرامبەر گەلی کوردستان هەرگیز کۆن نابن و "دەستی دادپەروەری هەر دەگاتە تاوانباران." جەختیشی کردەوە کە ئەمڕۆ سەلمێنرا ئیرادەی ژیان و ماف لە هەموو جۆرە ستەم و دڕندەییەک بەهێزترە.

 
لە بەشێکی تری پەیامەکەیدا، سەرۆکی هەرێمی کوردستان داوای لە حکومەتی عێراقی فیدراڵ کرد ئەرکە یاسایی و ئەخلاقییەکانی خۆی جێبەجێ بکات، بەتایبەت لە پرسی قەرەبووکردنەوەی ماددی و مەعنەویی کەسوکاری قوربانیانی ئەنفال، کە پێشتر لەلایەن دادگای باڵای تاوانەکانی عێراقەوە وەک "جینۆساید" ناسێنراوە.